Спартыўны навігатар
31 мая 2023 года № 7 (1293)
Студэнты факультэта фізічнага выхавання БДПУ паспяхова выступілі на першынстве Беларусі да 23 гадоў па дзюдо. Першае месца заваявалі другакурснікі Руслан Галавачоў (73 кг), Дзяніс Яўсеенка (81 кг), Сяргей Якубенка (+100 кг) і трэцякурснік Раман Манішка (100 кг). Другое – студэнт 3-га курса Глеб Хаткоўскі (81 кг).
Віншуем спартсменаў, а таксама іх трэнераў!
У рамках адкрытага міжуніверсітэцкага турніру па самба, прысвечанага 78-годдзю Перамогі савецкага народа ў Вялікай Айчыннай вайне, каманда БДПУ ва ўпартай барацьбе заваявала ганаровае другое месца, уступіўшы гаспадарам спаборніцтваў –зборнай Беларуска-Расійскага ўніверсітэта (г. Магілёў).
Залаты ўклад у камандны медалёвы залік унеслі Аляксандра Козел, Крысціна Герасіменка, Паліна Граматнева, серабро здабылі Дзмітрый Крылоў і Аліна Курыленка, бронзу – Таццяна Шык, Уладзіслаў Мароз, Анастасія Яўсеева.
У спаборніцтвах прынялі ўдзел 9 каманд – з шасці беларускіх і трох расійскіх універсітэтаў. Прыз за лепшую тэхніку, прадэманстраваную на спаборніцтвах, атрымала Аляксандра Козел.
Віншуем з паспяховым выступленнем самбістаў БДПУ, а таксама трэнераў, якія прымалі ўдзел у іх падрыхтоўцы да спаборніцтваў, – А.У. Катлоўскага і А.В. Хіжэўскага.
12 мая 2023 года № 6 (1292)
Спартсмены факультэта фізічнага выхавання БДПУ дастойна прадставілі Беларусь і alma mater на чэмпіянаце Еўропы па самба, які праходзіў 18–24 красавіка ў г. Хайфе (Ізраіль). Першае месца на спаборніцтвах заняла студэнтка 3-га курса Паліна Граматнева, трэцяе – другакурснік Ілья Ламіваротаў і трэцякурсніца Валерыя Хрушчова. Інтэрв’ю з Валерыяй, падрыхтаванае напярэдадні чэмпіянату, чытайце на стар. 3.
Віншуем самбістаў, а таксама іх трэнераў!
Студэнты факультэтаў фізічнага выхавання і дашкольнай адукацыі БДПУ прадэманстравалі выдатную спартыўную форму ў фінале Рэспубліканскай універсіяды па самба: дзяўчаты заваявалі каманднае золата, а хлопцы – серабро. Першыя месцы занялі Ілья Ламіваротаў, Аляксандра Козел, Паліна Граматнева, Валерыя Хрушчова. Другімі сталі Захар Козел, Аліна Курыленка, Анастасія Яўсеева. Бронзавыя медалі ў Крысціны Герасіменка, Ксеніі Кавальчук, Івана Юр’ева, Дзяніса Яўсеенкі, Рафаэля Этука. Да новых перамог!
Жаночая зборная БДПУ – сярэбраны прызёр Рэспубліканскай універсіяды па каратэ! Выдатныя рэзультаты паказалі нашы спартсменкі і ў асабістым заліку. Так, прадстаўніца факультэта фізічнага выхавання Стэфанія Собалева заваявала 1-е месца ў кумітэ (68 кг) і 2-е месца ў індывідуальным ката. На трэцяй прыступцы п’едэстала Анастасія Шылава (кумітэ, 61 кг), Марына Ціханская (кумітэ, 68кг) і МарыяМакеева(кумітэ, 68 кг). Віншуем!
Прадстаўнікі факультэта фізічнага выхавання БДПУ Аліна Курыленка, Ілья Рагозаў і Аляксей Кухарчык – уладальнікі залатых медалёў Рэспубліканскай універсіяды па вольнай барацьбе сярод мужчын і жанчын. Серабро на спаборніцтвах заваяваў першакурснік ФФВ Муслім Махмудаў. У выніку мужчынская зборная нашага ўніверсітэта заняла 4-е агульнакаманднае месца. Нагадаем, што ў спаборніцтвах Універсіяды прынялі ўдзел 23 каманды ўстаноў вышэйшай адукацыі краіны. Малайцы!
На Рэспубліканскім турніры па армрэстлінгу і гіравым спорце «Непераможны асілак» наш універсітэт быў прадстаўлены ў дзвюх дысцыплінах. І калі ў гіравым спорце ІІ месца заняў лідар зборнай – студэнт факультэта фізічнага выхавання Данііл Мязгоў (вагавая катэгорыя да 65 кг), то доўгачаканую перамогу ў армрэстлінгу нашаму ўніверсітэту прынесла магістрантка БДПУ Алеся Кірыльчык (вагавая катэгорыя да 53 кг). Бронзавым прызёрам стала студэнтка факультэта дашкольнай адукацыі Дар’я Акулік (вагавая катэгорыя звыш 67 кг). Так трымаць!
І яшчэ адна цудоўная навіна прыйшла ў першыя дні мая. Мужчынская зборная БДПУ па баскетболе стала пераможцай групы «2К» і заваявала права выступаць у наступным сезоне ў вышэйшым дывізіёне.
Віншуем хлопцаў і іх трэнераў – старшых выкладчыкаў кафедры фізічнага выхавання і спорту В.П. Круталевіч і Г.А. Кукель!
19 красавіка 2023 года № 5 (1291)
ПЕРШАКУРСНІЦА факультэта фізічнага выхавання БДПУ Дар’я Канцавая ва ўпартай барацьбе заваявала трэцяе месца на міжнародных спаборніцтвах па дзюдо, прысвечаных памяці Васілія Ашчэпкава. У турніры, які праходзіў у Хабараўску (Расійская Федэрацыя), прынялі ўдзел больш чым 400 дзюдаістаў з Арменіі, Беларусі, Ізраіля, Індыі, Манголіі, Расіі, Сербіі, Таджыкістана.Так трымаць!
ЯШЧЭ адна прадстаўніца БДПУ – студэнтка 1-га курса ФФВ Аляксандра Пятрова – перамагла на міжнародных спаборніцтвах па кулявой стральбе, якія праходзілі ў Шымкенце (Рэспубліка Казахстан).
Па выніках удзелу ў Гран-пры «Алтын Мерген» беларускія стралкі за чатыры дні здабылі 20 узнагарод: 8 залатых, 6 сярэбраных і 6 бронзавых. Віншуем Аляксандру і яе таварышаў па зборнай!
СТУДЭНТЫ факультэта фізічнага выхавання сталі прызёрамі адкрытага кубка Рэспублікі Беларусь па дзюдо. Першае месца ў сваіх вагавых катэгорыях заваявалі Валерыя Хрушчова (78+), Дар’я Канцавая (78-), Сяргей Якубенка (100+). Другое занялі Жанна Асіповіч (70), Дзяніс Яўсеенка (81), Раман Манішка (100). На трэцім – Руслан Амрахаў (абсалютная вагавая катэгорыя) і Іван Юр’еў (90). Віншуем спартсменаў БДПУ і іх трэнераў!
ПЕРШАКУРСНІК БДПУ Ілья Рагозаў ва ўпартай барацьбе заваяваў золата першынства Рэспублікі Беларусь па вольнай барацьбе. Новых перамог зычым прадстаўніку факультэта фізічнага выхавання і яго трэнеру А.Л. Лейкіну!
5 красавіка 2023 года № 4 (1290)
СТУДЭНТЫ БДПУ выдатна выступілі на першынстве Рэспублікі Беларусь па самба. Перамогу святкавала прадстаўніца факультэта фізічнага выхавання (ФФВ) Паліна Граматнева. Другое месца занялі студэнткі факультэтаў дашкольнай адукацыі і ФФВ – Анастасія Яўсеева і Крысціна Герасіменка. На трэцім – першакурснікі Уладзіслаў Марозаў (ФФВ) і Таццяна Шык (філалагічны факультэт).
На спаборніцтвах праводзіўся адбор спартсменаў-самбістаў на першынство і чэмпіянат Еўропы па самба, якія пройдуць 18–24 красавіка ў Хайфе (Ізраіль). Віншуем студэнтаў БДПУ, якія ўвайшлі ў склад зборнай Рэспублікі Беларусь, – Іллю Ламіваротава, Паліну Граматневу, Валерыю Хрушчову, а таксама іх трэнераў!
16 сакавіка 2023 года № 3 (1289)
СТУДЭНТЫ БДПУ сталі пераможцамі першынства Рэспублікі Беларусь сярод моладзі па дзюдо. Першае месца заваяваў трэцякурснік факультэта фізічнага выхавання Глеб Хаткоўскі, другое – першакурснік Сяргей Якубенка, трэцяе – Раман Манішка (3 курс) і Раман Броўка (1 курс). Віншуем трэнераў Д. Кунцэвіча, С. Карнейчыка, Ю. Смурговіча, А. Хіжэўскага і А. Катлоўскага з паспяховым выступленнем на спаборніцтвах іх выхаванцаў!
ДНЯМІ завяршыўся шосты па ліку чэмпіянат Рэспублікі Беларусь па міні-футболе сярод жаночых каманд. Сёлета ў ім прынялі ўдзел шэсць каманд, тры з якіх прадстаўлялі ўстановы вышэйшай адукацыі краіны (БДПУ, БДУ, ГрДУ).
Перад заключным турам на 2-е і 3-е месцы на п’едэстале гонару прэтэндавалі тры зборныя. Каманда БДПУ «Педуніверсітэт» сур’ёзна настроілася на вырашальную гульню і з лікам 6:1 упэўнена абыграла зборную БДУ. Гэта перамога гарантавала нашым спартсменкам бронзавыя медалі. Заставалася толькі дачакацца заканчэння матча паміж камандамі «Славянка» і «Энергетык». Пры пэўным раскладзе ў нашых дзяўчат з’яўляўся шанец узняцца на другі радок турнірнай табліцы. На вялікі жаль, надзеі не спраўдзіліся і да срэбра не хапіла толькі аднаго бала.
З лепшых ігракоў турніру арганізатары склалі сімвалічную зборную. У яе склад увайшла студэнтка БДПУ Наталля Асмыковіч.
Віншуем каманду БДПУ і яе трэнера Сяргея Аркадзьевіча Траско з паспяховым выступленнем і жадаем далейшых спартыўных дасягненняў!
20 лютага 2023 года № 2 (1288)
СПАРТСМЕНЫ нашага ўніверсітэта 18 лютага дружнай камандай выйшлі на старт Усебеларускай студэнцкай лыжні. Аматараў гэтага віду спорту з устаноў вышэйшай і сярэдняй спецыяльнай адукацыі краіны прымала сталічная Вяснянка. Нашы лыжнікі на чале з дэканам факультэта фізічнага выхавання БДПУ К.Ю. Раманавым удала выступілі ў эстафетах і масавай гонцы. Падбадзёрыць спартсменаў прыехалі прарэктар па вучэбнай рабоце А.В. Макоўчык і група падтрымкі, якая налічвала больш за 120 чалавек. Усяго ў спартыўным свяце, арганізаваным Міністэрствам адукацыі сумесна з Міністэрствам спорту і турызму, прынялі ўдзел каля 700 чалавек.
У МІЖНАРОДНЫМ турніры па самба на прызы Прэзідэнта Рэспублікі Беларусь прынялі ўдзел студэнты БДПУ – прадстаўнікі факультэтаў фізічнага выхавання і дашкольнай адукацыі. Па выніках спаборніцтва першае месца заваявала Валерыя Хрушчова (ФФВ), другое – Анастасія Яўсеева (ФДА), Паліна Граматнева і Ілья Ламіваротаў (ФФВ). Трэцюю прыступку на п’едэстале гонару заняла Крысціна Герасіменка (ФФВ). Віншуем з выдатнымі рэзультатамі спартсменаў БДПУ, а таксама іх трэнераў – прафесара А.В. Хіжэўскага і дацэнта А.У. Катлоўскага.
8 снежня 2022 года № 14 (1284)
Зборныя каманды БДПУ па дзюдо – пераможцы леташняй Рэспубліканскай універсіяды – апраўдалі спадзяванні трэнерскага штаба і сваіх балельшчыкаў і ўпэўнена, з добрымі рэзультатамі правялі ўсе паядынкі ў рамках Рэспубліканскай універсіяды-2022/2023. У выніку і жаночая, і мужчынская каманды БДПУ занялі першае месца.
Вынікі ў асабістых заліках таксама ўражваюць. У мужчын золата заваявалі Захар Козел і Раман Манішка (вагавыя катэгорыі, адпаведна, да 81 і да 100 кг), срэбра – Раман Броўка, Іван Юр’еў і Сяргей Якубенка (да 60, да 90, звыш 100 кг), бронзу – Рафаэль Этука (да 100 кг).
У абсалютнай вагавой катэгорыі прадстаўнік нашага ўніверсітэта Сяргей Якубенка заняў II месца. Дзюдаісткі БДПУ тройчы ўзнімаліся на верхнюю прыступку п’едэстала гонару. Гэта Жанна Асіповіч, Дар’я Канцавая і Валерыя Хрушчова (вагавыя катэгорыі, адпаведна, да 70, да 78 і звыш 78 кг). На другім месцы – Ксенія Кавальчук і Паліна Граматнева (да 70 і да 78 кг). На трэцім – Аляксандра Козел і (да 57 і звыш 78 кг). Анастасія Яўсеева.
У абсалютнай вагавой катэгорыі перамогу святкавала Дар’я Канцавая.
Віншуем з бліскучым выступленнем усіх спартсменаў, а таксама іх трэнераў – прафесара А.В. Хіжэўскага, намесніка дэкана ФФВ па спартыўнай рабоце А.У. Катлоўскага і намесніка дэкана ФФВ па выхаваўчай рабоце К.У. Касьяніка. Да новых перамог!
«Н»-даведка. У турніры прынялі ўдзел 206 спартсменаў (127 мужчын і 79 жанчын) з 28 універсітэтаў краіны.
23 лістапада 2022 года № 13 (1283)
СТУДЭНТЫ факультэта фізічнага выхавання БДПУ Арсеній Чагрынец і Сямён Пехцераў здабылі бронзавыя медалі ў вагавых катэгорыях (адпаведна) 60 і 69 кг у рамках Рэспубліканскай універсіяды па боксе, якая прайшла ў Гомельскім абласным цэнтры алімпійскага рэзерву адзінаборстваў. Прадстаўніком каманды выступіў старшы выкладчык кафедры спартыўна-педагагічных дысцыплін Сяргей Аляксандравіч Глінскі. Віншуем спартсменаў з удалым выступленнем!
P.S. Усяго ў спаборніцтвах прымалі ўдзел 105 баксёраў у дзесяці вагавых катэгорыях.
31 кастрычніка 2022 года № 12 (1282)
СТУДЭНТКІ БДПУ сталі прызёрамі Маладзёжнага чэмпіянату свету па самба ў Ерэване (Арменія). У сваіх вагавых катэгорыях другакурсніца факультэта фізічнага выхавання Валерыя Хрушчова і трэцякурсніца Паліна Граматнева заваявалі адпаведна 3-е і 2-е месцы. Гэта пры тым, што канкурэнцыя была вельмі вялікай: усяго ў турніры прынялі ўдзел каля 500 спартсменаў з Арменіі, Балгарыі, Беларусі, Германіі, Грэцыі, ЗША, Ізраіля, Ісландыі, Італіі, Кіпра, Латвіі, Паўднёвай Карэі, Расіі. Віншуем спартсменак і іх трэнераў А.У. Катлоўскага і А.В. Хіжэўскага з паспяховым выступленнем!
ГОНАР alma mater на Спартакіядзе Саюзнай дзяржавы «Мы выбіраем спорт!» (г. Валгаград, РФ) адстойвала мужчынская зборная БДПУ па міні-футболе. Набраўшы максімальную колькасць ачкоў на групавым этапе спаборніцтва, нашы футбалісты заслужана выйшлі ў фінал турніру, дзе ва ўпартым паядынку ўступілі сапернікам з БДУ і занялі 2-е месца. Усяго ў турніры прынялі ўдзел 8 каманд. Прыемна канстатаваць, што ўвесь п’едэстал гонару спаборніцтваў па міні-футболе занялі студэнцкія каманды з Рэспублікі Беларусь.
Жадаем футбалістам і іх трэнерам С.А. Траско і В.К. Мухлядзе далейшых спартыўных перамог!
БОЛЬШ за 100 студэнтаў БДПУ прынялі ўдзел ва ўрачыстай цырымоніі адкрыцця Рэспубліканскай універсіяды-2022/2023, а чацвёра – яшчэ і ў традыцыйным парадзе спартсменаў устаноў вышэйшай адукацыі краіны. Акрамя таго, па просьбе арганізатараў мерапрыемства прадстаўнікі факультэта фізічнага выхавання alma mater прэзентавалі прысутным універсітэцкі спартыўна-адукацыйны праект «Беларусіяда». Усе жадаючыя далучыліся да рухавых беларускіх народных спартыўных гульняў «Пальчатка» і «Перацяжкі».
Падчас мерапрыемства міністр адукацыі Рэспублікі Беларусь А.І. Іванец, намеснік міністра спорту і турызму А.І. Барауля, старшыня Беларускай асацыяцыі студэнцкага спорту А.В. Багдановіч і іншыя ганаровыя госці ўзнагародзілі пераможцаў і прызёраў камандных першынстваў, а таксама абсалютнага пераможцу Універсіяды-2021 – зборную БДУФК. Нагадаем, што наш універсітэт па выніках мінулага года займае 4-е месца. Жадаем камандам БДПУ ўдала выступіць у спаборніцтвах Рэспубліканскай універсіяды-2022/2023 і вярнуцца на п’едэстал гонару!
ДРУГАКУРСНІК факультэта фізічнага выхавання БДПУ, майстар спорту па самба Ілья Ламіваротаў заваяваў бронзавы медаль XXVII Мемарыялу чэмпіёна Еўропы Уладзіміра Кулікова «VLADIMIR. Бітва першых» (г. Дзяржынск, РФ). Сапернікамі беларускага спартсмена на міжнародным турніры сталі тытулаваныя барцы з Арменіі, Беларусі, Казахстана, Кыргызстана, Малдовы, Расіі, Таджыкістана і Узбекістана – чэмпіёны Еўропы і Азіі, пераможцы і прызёры сусветных спаборніцтваў.
Віншуем спартсмена і яго трэнера – прафесара А.В. Хіжэўскага!
18 кастрычніка 2022 года № 11 (1281)
СТУДЭНТЫ БДПУ паспяхова выступілі ў складзе зборнай Рэспублікі Беларусь у майстарскім турніры «Легенды Пецярбургскага дзюдо» сярод мужчын і жанчын (г. Санкт-Пецярбург, Расійская Федэрацыя). У спаборніцтвах, якія маюць статус усерасійскіх, прынялі ўдзел 240 атлетаў з 32 рэгіёнаў Расійскай Федэрацыі і дзюдаісты зборнай Рэспублікі Беларусь. Першае месца і тытул наймацнейшых заваявалі прадстаўнікі факультэта фізічнага выхавання нашага ўніверсітэта – першакурсніца Дар’я Канцавая і студэнт 2-га курса Руслан Галавачоў. На трэцяй прыступцы п’едэстала – першакурснік Сяргей Якубенка і выпускнік 2022 года Даніэл Мукетэ. Пятае месца заняў студэнт 3-га курса Глеб Хаткоўскі.
Віншуем нашых спартсменаў і іх трэнераў – А.У. Катлоўскага, Д.У. Кунцэвіча, Л.С. Рабцава, А.Р. Фандо, А.В. Хіжэўскага. Поспехаў на міжнародных і рэспубліканскіх арэнах!
АДБЫЛАСЯ традыцыйная вераснёўская спартландыя сярод першакурснікаў усіх факультэтаў і інстытутаў БДПУ «Першы трыумф». На ўрачыстай цырымоніі яе адкрыцця прарэктар па вучэбнай рабоце А.В. Макоўчык павіншаваў усіх прысутных з удзелам у першым спартыўным мерапрыемстве ў статусе студэнтаў вядучага педагагічнага ўніверсітэта краіны. Таксама Аляксандр Васільевіч прапанаваў навабранцам прадэманстраваць свае найлепшыя якасці, у тым ліку волю да перамогі.
Начальнік СК «Педагог» І.Р. Моргун, у сваю чаргу, пажадаў спартсменам і балельшчыкам атрымаць задавальненне ад мерапрыемства і заклікаў усіх займацца спортам і весці здаровы лад жыцця.
Кожная эстафета праходзіла ва ўпартай барацьбе, бо прадстаўнікі факультэтаў і інстытутаў імкнуліся даказаць, што яны самыя хуткія і спрытныя. Тым не менш, як і павінна быць на свяце спорту і здароўя, у зале панавала атмасфера сяброўства і ўзаемнай павагі.
Па выніках спартландыі першыя месцы ў сваіх групах занялі факультэты дашкольнай адукацыі, фізічнага выхавання і прыродазнаўства. Усе каманды-ўдзельніцы атрымалі салодкія падарункі ад рэктарата БДПУ, а пераможцы – яшчэ і сертыфікаты на спецыяльныя прызы ад прафкама студэнтаў БДПУ.
Да новых спартыўных вяршынь, сябры!
22 верасня 2022 года № 10 (1280)
СПАРТЫЎНАЯ ТРАДЫЦЫЯ ЯДНАЕ ПАКАЛЕННІ
БДПУ можа заслужана ганарыцца ўласнымі спартыўнымі праектамі і мерапрыемствамі, якія набываюць усё большую папулярнасць не толькі ў сценах alma mater, але і за яе межамі. Аднак заўжды прыемна паўдзельнічаць у спаборніцтвах больш шырокага маштабу, асабліва калі ты – не прафесійны спартсмен, а аматар. Ужо каторы год запар танкаўцы ахвотна дэманструюць трываласць ды іншыя фізічныя якасці, а таксама моцную карпаратыўную згуртаванасць падчас Мінскага паўмарафону. Удзел у масавым забегу стаў для БДПУ традыцыйным; больш за тое, ён з году ў год яднае розныя пакаленні – студэнтаў усіх курсаў, прадстаўнікоў прафесарска-выкладчыцкага складу і нават членаў іх сямей. Штрыхі да сёлетняга маштабнага спартыўна-масавага свята – ва ўражаннях яго ўдзельнікаў.
С.А. Глінскі, старшы выкладчык кафедры спартыўна-педагагічных дысцыплін, намеснік дэкана па спартыўнай рабоце факультэта фізічнага выхавання:
– У Мінскім паўмарафоне я ўдзельнічаю з 2015 г. Традыцыйна ён праводзіцца ў рамках святкавання Дня горада Мінска. За гэты перыяд бегаў на розныя дыстанцыі – ад 5 да 21,097 км (у скарбонцы ўжо 7 медалёў!). У 2018 г. давялося прабегчы нават дзве дыстанцыі: спачатку са студэнтамі і выкладчыкамі БДПУ – 5,5 км (са сцягам універсітэта), потым выйшаў на старт дыстанцыі 21,097 км і паспяхова яе пераадолеў.
Эмоцыі ад гэтага маштабнага мерапрыемства адназначна станоўчыя, на кожным участку маршрута адчуваецца падтрымка. Дарэчы, часта сустракаю на дыстанцыі тых, з кім бег у мінулым годзе. Ужо другі год удзельнічаю ў паўмарафоне з сынам Аляксандрам. Яму 11 гадоў, і дыстанцыю 5 км ён пераадольвае ўпэўнена, з задавальненнем. Што і казаць – бег аб’ядноўвае! Усім зычу здароўя, поспехаў, цярпення і сіл. Да сустрэчы ў наступным годзе на старце.
С. І. Васілец, прарэктар па вучэбнай рабоце:
Для мяне ўдзел у паўмарафоне – гэта перш за ўсё падтрымка выдатнай універсітэцкай традыцыі, адчуванне запалу і згуртаванасці. І нарэшце, гэта магчымасць праверыць сябе на ўпартасць у дасягненні мэты.
Т.К. Чыгір, выкладчык кафедры педагогікі і псіхалогіі інклюзіўнай адукацыі ІІА:
– Я прымаю ўдзел у паўмарафоне ўжо не першы год. Кожны раз гэтае мерапрыемства выклікае масу станоўчых эмоцый: спартыўны імпэт і радасць ад пераадолення дыстанцыі, разуменне таго, як шмат цябе аб’ядноўвае з іншымі людзьмі, усведамленне асабістага дачынення да здаровага ладу жыцця.
Творчы падыход асобных удзельнікаў марафону падтрымліваў пазітыўны настрой на працягу ўсёй дыстанцыі. Міжволі ўсміхнешся, калі побач бяжыць дзяўчынка з кошыкам піражкоў – гераіня казкі «Чырвоны Капялюшык» або цябе падбадзёрваюць Мумія з Клеапатрай. Асаблівы гонар і павагу выклікалі ўдзельнікі марафону сталага ўзросту, а каштоўнасці гэтаму мерапрыемству дадавалі сямейныя каманды.
Паўмарафонскую дыстанцыю я бегла разам са студэнткай з Узбекістана Махліё. На маршруце яна сустракала шмат усмешлівых, адкрытых людзей – беларусаў і бачыла іх яднанне. Марафон таксама дазволіў правесці невялікую (беглую ва ўсіх сэнсах) экскурсію па цэнтры горада і пазнаёміць нашу замежную студэнтку з яго славутасцямі. Вось такі культурна-аздараўленча-асветніцкі атрымаўся для мяне марафон.
Вера Мялешка, першакурсніца ІІА:
– Удзел у Мінскім паўмарафоне-2022 на чале з рэктарам універсітэта аб’яднаў студэнтаў і выкладчыкаў. Нас было шмат, і мы, як гэта прынята ў вялікай і дружнай сям’і, беглі разам! Нават мой брат з Санкт-Пецярбурга прыехаў падтрымаць мяне і мой універсітэт і пераадолеў дыстанцыю ў 21,1 км, адзначыўшы вельмі высокі ўзровень арганізацыі мерапрыемства. Паўмарафон – сапраўднае свята для ўсіх, хто за здаровы лад жыцця!
І.А. Белакурская, старшы выкладчык кафедры агульнай і дзіцячай псіхалогіі ФДА, кіраўнік цьютар-клуба «Старэйшы сябар»:
– Пачынаючы з 2015 г. студэнты-цьютары штогод разам са сваімі падапечнымі ўдзельнічаюць у гэтым масавым спартыўным мерапрыемстве. Дарэчы, менавіта ў той год на факультэце стартавала праца па сацыялізацыі першакурснікаў праз цьютарскую падтрымку. Сёлета для ўдзелу ў Мінскім паўмарафоне цьютары ФДА падрыхтавалі прыгожую карпаратыўную форму для першакурснікаў і на працягу ўсяго мерапрыемства былі побач з імі. Нягледзячы на дождж, кожны са студэнтаў фінішаваў з выдатным настроем, радаваўся медалю ўдзельніка, адчуўшы карпаратыўны дух дружнай сям’і БДПУ.
В.У. Гардзіюк, выкладчык кафедры агульнай і дзіцячай псіхалогіі ФДА, куратар з 20-гадовым стажам:
– Удзел у Мінскім паўмарафоне для некаторых стаў сапраўднай лёсавызначальнай падзеяй: некалькі першакурсніц ФДА менавіта на дыстанцыі сустрэлі сваіх будучых мужоў. Згадзіцеся, прыемны «пабочны эфект»!
Тыя куратары і студэнты, якія не раз выходзілі на старты Мінскага паўмарафону, прадчуваюць сустрэчы з цікавымі людзьмі, знакамітымі спартсменамі краіны. Вялізная колькасць усмешак, яркіх фарбаў, сцягоў, гучных дэвізаў факультэцкіх каманд БДПУ – усё гэта стварае атмасферу шчырага, напоўненага шчасцем свята.
А як аб’ядноўвае Мінскі паўмарафон куратараў і студэнтаў-першакурснікаў! Узнікае жаданне разам працаваць і перамагаць не толькі ў спорце, але і ў вучобе.ў вучобе.
Наталля Новік, Юлія Карась, студэнткі-цьютары:
– Наогул бег нельга назваць лёгкім заняткам, але ўсе ўдзельнікі падбадзёрвалі адзін аднаго, матывавалі не спыняцца, і гэта вельмі дапамагала. Сярод марафонцаў не адчувалася саперніцтва, панавала сяброўская атмасфера, і гэта радавала неймаверна! Хтосьці скажа, што галоўнае ў паўмарафоне – медаль, але я ўпэўнена, што гэта толькі прыемны бонус да тых станоўчых эмоцый, якія адчуваеш на фінішы. Усведамленне таго, што дыстанцыя пераадолена, нараджае пачуццё гонару за сябе і сяброў. Успаміны пра гэты пахмурны дзень будуць для нас самымі сонечнымі.
ПА ВЫНІКАХ чэмпіянату і першынства Еўропы па самба (Нові-Сад, Сербія) студэнткі БДПУ Паліна Граматнева і Валерыя Хрушчова заваявалі адпаведна 2-е (вагавая катэгорыя да 80 кг) і 3-е (звыш 80 кг) месцы. Пяты рэзультат на чэмпіянаце Еўропы ў вагавай катэгорыі да 71 кг паказаў першакурснік факультэта фізічнага выхавання Ілья Ламіваротаў.
Падрыхтоўку студэнтаў да спаборніцтваў ажыццяўлялі супрацоўнікі ФФВ – дацэнт А.У. Катлоўскі і прафесар А.В. Хіжэўскі.
СТУДЭНТЫ факультэта фізічнага выхавання БДПУ паспяхова выступілі на чэмпіянаце Рэспублікі Беларусь па дзюдо (Мінск, 8–9 верасня). Першыя месцы і тытул наймацнейшых дзюдаістаў краіны заваявалі першакурсніца Дар’я Канцавая, другакурснік Руслан Галавачоў, трэцякурснікі Жанна Асіповіч і Максім Чарняк, а таксама выпускнік 2022 года Даніэл Мукетэ. Бронзавы медаль дастаўся студэнту завочнай формы навучання – другакурсніку Рафаэлю Этуку. За крок ад п’едэстала гонару спыніліся Сяргей Якубенка, Раман Манішка, Захар Козел і Дзяніс Яўсеенка.
У адкрытым чэмпіянаце Рэспублікі Беларусь сярод змешаных каманд нашу краіну дый сваю alma mater прадстаўлялі ўжо ўзгаданыя вышэй Жанна Асіповіч, Дар’я Канцавая і Даніэл Мукетэ. Яшчэ да завяршэння спаборніцтва яны сталі чэмпіёнамі Рэспублікі Беларусь, бо перамаглі ў баях за выхад у фінал другую нацыянальную зборную Расіі. А ў фінале пераканаўча даказалі, што мацнейшыя і за зборную Расіі-1.
Віншуем беларускіх спартсменаў і жадаем ім далейшых поспехаў на міжнароднай арэне! Перадаём словы падзякі і захаплення іх трэнерам – А.А. Шлыку, Л.С. Рабцаву, А.Р. Фандо, Д.У. Кунцэвічу, А.В. Хіжэўскаму і А.У. Катлоўскаму за важкі ўклад у дасягненні нашых дзюдаістаў!
1 верасня 2022 года, № 9 (1279)
ПРАДСТАЎНІЦЫ факультэта фізічнага выхавання БДПУ – выпускніца Марыя Кандрацьева, другакурсніцы Валерыя Хрушчова і Паліна Граматнева занялі адпаведна 1-е, 2-е і 5-е месцы на VI Міжнародным турніры па самба «Мемарыял Заслужанага трэнера СССР Міхаіла Бурдзікава». Спаборніцтвы праходзілі ў г. Кстова Ніжагародскай вобласці Расіі. Падрыхтоўку да турніру ажыццяўляў прафесар кафедры фізічнага выхавання і спорту А.В. Хіжэўскі.
ЗБОРНАЯ БДПУ па дзюдо – чэмпіён Рэспубліканскай універсіяды мінулага года ў гэтым відзе спорту – прыняла ўдзел у VIII Усерасійскай летняй універсіядзе-2022. Пераможцай спаборніцтваў сярод дзяўчат стала студэнтка ФФВ Жанна Асіповіч (вагавая катэгорыя 70 кг). Бронзавага медаля ўдастоены яшчэ адзін прадстаўнік факультэта фізічнага выхавання – Максім Чарняк (вагавая катэгорыя 81 кг).
Віншуем спартсменаў і іх трэнера А.У. Катлоўскага з паспяховым выступленнем!
31 мая 2022 года № 7 (1277)
СТУДЭНТ факультэта фізічнага выхавання БДПУ Кірыл Маскевіч заняў другое месца у фінале першага турніру Барцоўскай лігі Паддубнага па грэка-рымскай барацьбе (вагавая катэгорыя да 87 кг). Дададзім, што сёлета спаборніцтва было арганізавана ўпершыню. У Маскву для ўдзелу ў ім прыехалі звыш 600 спартсменаў з 10 краін свету, у тым ліку прадстаўнікі Беларусі.
МУЖЧЫНСКАЯ зборная БДПУ па баскетболе 3х3 – бронзавы прызёр Рэспубліканскай універсіяды! Медаль нашаму ўніверсітэту прынеслі Кірыл Васкаўцоў, Данііл Каско, Іван Балдуеў, Ілья Мілашэўскі. За адзін крок ад п’едэстала гонару – на чацвёртым месцы – размясцілася жаночая каманда нашага ўніверсітэта. Спецыяльны прыз Беларускай федэрацыі баскетболу ў намінацыі MVP (Рэд. – найбольш каштоўны ігрок) турніру ўручаны Яне Макуца. Дададзім, што ў спаборніцтвах на базе спартыўнага комплексу Palova Арэна (г. Мінск) прымалі ўдзел 21 жаночая і 32 мужчынскія каманды ўстаноў вышэйшай адукацыі краіны.
ДРУГАКУРСНІЦА факультэта фізічнага выхавання БДПУ Валерыя Хрушчова святкавала перамогу ў чэмпіянаце Рэспублікі Беларусь сярод моладзі па дзюдо. Віншуем спартсменку і яе трэнера А.В. Хіжэўскага!
16 мая 2022 года № 6 (1276)
СПАРТАКІЯДА Ў ЗЕНІЦЕ
Круглагадовая спартакіяда БДПУ набліжаецца да свайго завяршэння. І сёння ўжо можна сказаць, што на спартыўных пляцоўках разварочвалася пасапраўднаму захапляльная і ўпартая барацьба.
У бягучым навучальным годзе аргкамітэт па правядзенні спаборніцтва прыняў рашэнне не падводзіць агульнакамандныя вынікі. Гэта дазволіла спартсменам скінуць велізарны груз адказнасці і атрымаць задавальненне ад стартаў і фінішаў. Яшчэ адным новаўвядзеннем стаў пункт у «Палажэнні аб правядзенні спартакіяды БДПУ», паводле якога сёлета дазволена ствараць аб’яднаныя каманды студэнтаў розных факультэтаў і інстытутаў. Камусьці гэта дапамагло ўзмацніць склад сваёй зборнай, а некаму (калі факультэт не мог сабраць паўнацэнную каманду) проста паўдзельнічаць у спаборніцтвах.
Працягваем знаёміць чытачоў «Н» (гл. № 3 ад 21 сакавіка) з дадзенымі турнірнай табліцы па асобных відах спорту.
Паводле першынства БДПУ па настольным тэнісе сярод мужчынскіх каманд прызавыя месцы размеркаваліся наступным чынам: гістарычны факультэт (1-е), факультэт фізічнага выхавання і Інстытут псіхалогіі (2-е), фізіка-матэматычны (3-е).
Лепшымі ў настольным тэнісе сярод жаночых каманд сталі: аб’яднаная зборная факультэтаў фізічнага выхавання і прыродазнаўства (1-е месца), фізікаматэматычнага (2-е), гістарычнага (3-е) факультэтаў.
Сёлета ў рамках круглагадовай спартакіяды БДПУ ўпершыню прайшлі спаборніцтвы па баскетболе 3х3. Па выніках першынства ў тройцы мацнейшых сярод мужчын апынуліся: факультэты фізічнага выхавання і фізікаматэматычны (1-е месца), прыродазнаўства (2-е), гістарычны (3-е). Сярод жанчын – факультэт фізічнага выхавання і Інстытут інклюзіўнай адукацыі (1-е), Інстытут псіхалогіі (2-е), факультэт пачатковай адукацыі (3-е).
У басейне БДПУ адбыліся спаборніцтвы па плаванні, у якіх прынялі ўдзел больш за 50 чалавек. Мерапрыемства прайшло на высокім арганізацыйным узроўні і з’явілася адным з этапаў адбору ў зборную каманду БДПУ.
Самымі масавымі сталі спаборніцтвы па валейболе сярод жаночых каманд. У іх прынялі ўдзел 9 каманд (звыш 80 чалавек). У выніку месцы размеркаваліся наступным чынам: Інстытут псіхалогіі (1-е), факультэты фізічнага выхавання і прыродазнаўства (2-е), фізіка-матэматычны (3-е).
У лесапаркавай зоне мікрараёна «Копішча» ў рамках круглагадовай спартакіяды БДПУ прайшлі спаборніцтвы па спартыўным арыентаванні, у якіх прынялі ўдзел 49 чалавек. Мацнейшымі сярод юнакоў былі Пётр Казырыцкі (ФСПТ), Яўген Бінько (фізмат), Уладзіслаў Вінакураў (ФФВ). Сярод дзяўчат – Крысціна Касабуцкая (фізмат), Маргарыта Красоўская (ФФВ), Дар’я Алейчык (ФЭА).
Віншуем пераможцаў і прызёраў спаборніцтваў і жадаем далейшых спартыўных поспехаў!
P.S. Запрашаем усіх аматараў спорту і здаровага ладу жыцця 19 мая на стадыён БДПУ, дзе адбудзецца доўгачаканае спартыўнае свята «Дзень здароўя». У яго праграме: урачыстая цырымонія з удзелам прадстаўнікоў рэктарата ўніверсітэта і запрошаных гасцей; адкрыццё спартыўнага трэнажорнага комплексу; правядзенне спартландый і таварыскіх сустрэч па міні-футболе; спаборніцтвы па перацягванні каната; беларускія народныя спартыўныя гульні ў рамках спартыўна-адукацыйнага праекта «Беларусіяда»; лёгкаатлетычная эстафета; конкурсы і забавы; канцэртная праграма з удзелам вядучых калектываў БДПУ.
Іван МОРГУН, начальнік спартыўнага клуба «Педагог»
25 красавіка 2022 года № 5 (1275)
Віншуем мужчынскую і жаночую зборныя БДПУ па дзюдо з золатам Рэспубліканскай універсіяды! У асабістым заліку першае месца ў сваіх вагавых катэгорыях заваявалі студэнты факультэта фізічнага выхавання Даніэль Мукітэ, Жанна Асіповіч, Максім Чарняк, Валерыя Хрушчова, Руслан Галавачоў і магістрант Аляксандр Сідорык.
На другой прыступцы п’едэстала – таксама прадстаўнікі ФФВ Аліна Пасталоўская, Аляксандра Козел і Раман Манішка. Бронзавых медалёў у асабістым заліку ўдастоены спартсмены Рафаэль Этука (адразу ў дзвюх вагавых катэгорыях), Валерыя Хрушчова, Паліна Граматнева (ФФВ) і Анастасія Яўсеенка (ФДА). Віншуем з паспяховым выступленнем будучых педагогаў і іх трэнераў – загадчыка кафедры фізічнага выхавання і спорту А.В. Хіжэўскага і дацэнта гэтай жа кафедры А.У. Катлоўскага!
Так трымаць!
21 сакавіка 2022 года № 3 (1273)
ЗОЛАТА першынства Рэспублікі Беларусь па самба сярод юніёраў у сваіх вагавых катэгорыях заваявалі студэнткі БДПУ Валерыя Хрушчова і Паліна Граматнева (ФФВ). Срэбраным медалём узнагароджана прадстаўніца факультэта дашкольнай адукацыі Анастасія Яўсеева, бронзавым – трэцякурснік факультэта фізічнага выхавання Кірыл Чарняўскі. Да новых перамог!
СТУДЭНТ факультэта фізічнага выхавання Ілля Ламіваротаў заняў ІІ месца на Усерасійскіх спаборніцтвах па самба сярод мужчын «Памяці Ю.А. Гагарына» (вагавая катэгорыя 71 кг). Віншуем спартсмена і яго настаўнікаў – Заслужанага трэнера Рэспублікі Беларусь А.В. Хіжэўскага і Заслужанага трэнера Расійскай Федэрацыі Р.М. Ламіваротава.
ПРАДСТАЎНІЦЫ БДПУ – студэнтка 2-га курса факультэта фізічнага выхавання Валерыя Хрушчова і першакурсніца факультэта дашкольнай адукацыі Анастасія Яўсеева – прадэманстравалі сваё майстэрства на першынстве Беларусі па дзюдо «Кубак А.А. Мельнікава» ў Магілёве. Па выніках спаборніцтва нашы дзяўчаты занялі 1-е і 3-е месцы (адпаведна). Так трымаць!
ЗАВЯРШЫЎСЯ І турнір па мініфутболе сярод устаноў вышэйшай адукацыі г. Мінска, у якім прынялі ўдзел 7 каманд. З радасцю паведамляем, што зборная БДПУ заняла ў ім першае месца, перамогшы ў фінальнай гульні з пераканаўчым лікам 8:2 сваіх сапернікаў з МДЛУ. Выйграць спаборніцтвы заўжды прыемна, а выйграць першы па ліку турнір – значыць упісаць сябе ў гісторыю. Падчас цырымоніі ўзнагароджання акрамя кубка і залатых медалёў зборная БДПУ была адзначана і ў спецыяльнай намінацыі. Арганізатары спаборніцтваў прызналі лепшым іграком турніру Данілу Яраша!
Віншуем каманду і трэнерскі штаб з паспяховым выступленнем!
28 лютага 2022 года № 2 (1272)
ЗАРАД БАДЗЁРАСЦІ НАПРЫКАНЦЫ ЗІМЫ
Біятлонная каманда БДПУ стала ўдзельніцай Рэспубліканскага спартыўна-масавага мерапрыемства «Усебеларуская студэнцкая лыжня-2022». Сёлета на лыжаролернай трасе «Вяснянка» яна сустрэлася з прадстаўнікамі 30 універсітэтаў краіны і навучэнцамі ўстаноў сярэдняй спецыяльнай адукацыі. Усяго за прызы ў біятлоннай эстафеце і масавых гонках змагалася звыш 650 чалавек.
Падчас урачыстай цырымоніі адкрыцця студэнцкай лыжні ўдзельнікаў спартыўнага свята вітаў міністр адукацыі Рэспублікі Беларусь А.І. Іванец. Падтрымаць універсітэцкую біятлонную каманду прыехалі рэктар БДПУ А.І. Жук і прарэктар па вучэбнай рабоце А.В. Макоўчык. Дзяліліся добрым настроем, падбадзёрвалі спартсменаў таксама балельшчыкі і вакальны калектыў БДПУ «Модус». Аднак, нягледзячы на ўсе прыкладзеныя намаганні, трапіць на п’едэстал нашай камандзе не ўдалося.
У масавым заездзе на лыжах прынялі ўдзел 42 студэнты нашага ўніверсітэта, а таксама намеснік дэкана факультэта фізічнага выхавання па спартыўнай рабоце С.А. Глінскі. Дыстанцыю працягласцю 3 км ён пераадолеў са сваім сынам, чарговы раз даказаўшы, што прафесарска-выкладчыцкі склад БДПУ знаходзіцца ў цудоўнай фізічнай форме і можа служыць прыкладам для падрастаючага пакалення.
Прыемна было назіраць за танкаўцамі на фінішы: кожны з іх адчуваў сябе часткай маштабнага зімовага свята. Усе ўдзельнікі атрымалі зарад пазітыўных эмоцый, яркіх уражанняў і медаль на памяць.
Іван МОРГУН, начальнік спартыўнага клуба «Педагог»
21 студзеня 2022 года, № 1 (1271)
ДРУГАКУРСНІЦА БДПУ Аляксандра Козел заваявала золата ХХХІІ Рэспубліканскага традыцыйнага турніру па самба памяці воінаў-інтэрнацыяналістаў Аляксандра і Станіслава Фяркоі атрымала права на прысваенне ёй звання майстра спорту. Так трымаць!
СТУДЭНТЫ факультэта фізічнага выхавання Кірыл Варабей і Данііл Бадзееў занялі адпаведна ІІ і ІІІ месцы ў сваіх вагавых катэгорыях у адкрытым турніры па таэквандо ITF «Кубак СНД – Кубак Свету». Дададзім, што сёлета спаборніцтва было самым прадстаўнічым і сабрала больш за 800 спартсменаў з 31 краіны. Да новых перамог!
ПЯЦЬ медалёў – два залатыя і тры сярэбраныя – такі вынік удзелу студэнтаў факультэта фізічнага выхавання ў Кубку Рэспублікі Беларусь па самба. Віншуем спартсменаў Паліну Граматневу, Ілью Ламіваротава (1-е месца), Аляксандру Козел, Валерыя Хрушчова, Анастасію Яўсееву (2-е месца) і іх трэнераў!
29 кастрычніка 2021 года № 13 (1267)
Надзвычай ураджайнай выдалася сёлетняя восень для лепшых выхаванцаў факультэта фізічнага выхавання БДПУ, якія дасягаюць небывалых вышынь у розных відах спартыўнай барацьбы.
МАЛАДЗЁЖНАЕ першынство свету па самба прайшло15–17 кастрычніка ў Грэцыі (г. Салонікі). Другое месца ў сваёй вагавой катэгорыі заваявала студэнтка 2-га курса факультэта фізічнага выхавання Паліна Граматнева. Акрамя гэтага, спартсменка заняла трэцяе месца сярод юніёрак. Віншуем!
МУЖЧЫНСКАЯ каманда БДПУ па вольнай барацьбе заваявала 3-е месца ў праграме Рэспубліканскай універсіяды (Гродна, 12–14 кастрычніка). У асабістым першынстве пераможцамі і прызёрамі спаборніцтва сталі студэнты факультэта фізічнага выхавання Уладзіслаў Кайко (золата), Аркадзь Пагасян, Кацярына Сегень, Міхаіл Скорык (срэбра), Ганна Вагер, Дзмітрый Зарубскі, Аляксей Кухарчык, Крысціна Чайкоўская (бронза). Да новых перамог!
ПА ВЫНІКАХ чэмпіянату свету па грэка-рымскай барацьбе (г. Осла, Нарвегія) магістрант факультэта фізічнага выхавання Кірыл Маскевіч узняўся на другую прыступку п’едэстала гонару. Так трымаць!
НА ЧЭМПІЯНАЦЕ Рэспублікі Беларусь па дзюдо (Мінск, 14–16 кастрычніка) паспяхова выступілі студэнты факультэта фізічнага выхавання БДПУ Жанна Асіповіч і Аляксандр Сідорык (1-е месца), Максім Чарняк (2-е месца), Валерыя Баравік і Дзяніс Яўсеенка (3-е месца).
Віншуем спартсменаў і трэнерскі штаб!
Стабільны поспех нашых спартсменаў-барцоў на рэспубліканскай і міжнароднай арэне пракаменціраваў намеснік дэкана факультэта фізічнага выхавання па выхаваўчай і ідэалагічнай рабоце Аляксандр Уладзіміравіч Катлоўскі:
– На ФФВ вучыцца вялікая колькасць спартсменаў рознага ўзроўню, якія займаюцца больш чым 25 відамі спорту. Аднак нельга не прызнаць, што барцоўскі блок нашага ўніверсітэта адзін з наймацнейшых. Яго спартыўная слава вядома не толькі ў БДПУ, але далёка за межамі нашай alma mater і ўсёй краіны. Па такіх відах спорту, як дзюдо, самба і барацьба, наш універсітэт пастаянна становіцца або пераможцам, або ўваходзіць у першую тройку на Рэспубліканскай універсіядзе. Паказальны і той факт, што на працягу апошняга дзесяцігоддзя студэнты ФФВ уваходзяць у склад зборных каманд Рэспублікі Беларусь па барацьбе грэка-рымскай, барацьбе вольнай, дзюдо і самба. І не проста ўваходзяць, а з’яўляюцца лідарамі нацыянальных каманд. За час існавання факультэта нашы барцы ніколі не вярталіся без медалёў са спаборніцтваў міжнароднага ўзроўню. Студэнты БДПУ былі прызёрамі і пераможцамі чэмпіянатаў свету і Еўропы, першынстваў свету і Еўропы, удзельнікамі алімпійскіх гульняў у Лондане, Рыа-дэ-Жанэйра і Токіа. Вядома, такім узорным вынікам папярэднічае вялікая праца. Мы зараблялі свой аўтарытэт не адзін год і не па чутках ведаем, што ў сённяшніх перамогах ёсць заслуга многіх людзей, якія самі не выходзяць на п’едэстал, але ўкладаюць нямала сіл, ведаў, вопыту ў тое, каб на самых ганаровых п’едэсталах свету стаялі іх выхаванцы. Спартыўная слава БДПУ – гэта не проста індывідуальны поспех таленавітых студэнтаў, а сума многіх складнікаў, у ліку якіх граматнае кіраўніцтва ўніверсітэта і факультэта; адданая праца выкладчыцкага складу, у які ўваходзяць заслужаныя трэнеры і трэнеры вышэйшай катэгорыі (А.В. Хіжэўскі, Э.Х. Тажыеў); шчырыя парады выпускнікоў, якія рэкамендавалі сваім таварышам па зборнай паступаць на наш факультэт; цесны кантакт з трэнерскім штабам зборных каманд і кантакт з асабістымі трэнерамі спартсменаў. Усё гэта дапамагло стварыць адну з наймацнейшых студэнцкіх зборных Рэспублікі Беларусь і свету.
Трымаемся абранага курсу!
20 верасня 2021 года № 11 (1265)
СТУДЭНТЫ БДПУ паспяхова выступілі на I Гульнях краін СНД, якія з 4 па 11 верасня праходзілі ў расійскай Казані (Рэспубліка Татарстан). Трэцякурснікі факультэта фізічнага выхавання Ганна Вагер (жаночая барацьба) і Аркадзь Пагасян (вольная барацьба) занялі адпаведна другое і трэцяе месцы. Віншуем!
СТУДЭНТЫ факультэта фізічнага выхавання БДПУ Іван Балдуеў, Кірыл Васкаўцоў, Данііл Каско, Ілля Мілашэўскі ў складзе зборнай Беларусі заваявалі першы ў гісторыі краіны медаль Кубка свету па баскетболе 3х3. Усяго за шэсць з паловай хвілін гульнявога часу танкаўцы рэалізавалі восем рэзультатыўных кідкоў і дапамаглі камандзе стаць бронзавым прызёрам у матчы з егіпцянамі. Так трымаць!
У МЕЖАХ Рэспубліканскай акцыі «Тыдзень спорту і здароўя» ў Студэнцкім гарадку БДПУ прайшлі мерапрыемствы фізкультурнааздараўленчай і спартыўнай накіраванасці: майстарклас па беларускіх народных спартыўных гульнях «Беларусіяда», турніры па шашках і шахматах, спартландыя «Восеньскія старты», акцыя «Спорт і здароўе», іншыя. Таксама студэнты-танкаўцы прынялі ўдзел у акцыі Маскоўскага раёна г. Мінска «Мы за спорт – за здаровую нацыю!».
21 мая 2021 года № 7 (1261)
Другое каманднае месца сярод жанчын і трэцяе сярод мужчын заваявалі зборныя БДПУ па самба ў рамках спаборніцтваў Рэспубліканскай універсіяды–2021. Гэта вельмі годны вынік, улічваючы тое, што ў турніры прымалі ўдзел спартсмены з 26 універсітэтаў Беларусі.
У асабістым заліку вызначыліся студэнты факультэта фізічнага выхавання Вера Гарэлікава, Аліна Пасталоўская, Аляксандр Сідорык (1-е месца), Валерыя Баравік, Паліна Граматнева (2-е), Раман Манішка і Багдан Войцік (3-е). Асобна адзначым прадстаўнікоў Інстытута псіхалогіі і ФФВ – Анастасію Казека і Кірыла Чарняўскага, якія сталі пятымі ў вагавых катэгорыях з вельмі вялікай колькасцю ўдзельнікаў. Так, у групе Кірыла за перамогу змагаліся 32 спартсмены!
Віншуем пераможцаў і прызёраў, а таксама іх трэнераў – загадчыка кафедры фізічнага выхавання і спорту Алега Віктаравіча Хіжэўскага і старшага выкладчыка кафедры спартыўна-педагагічных дысцыплін Аляксандра Уладзіміравіча Катлоўскага!
30 красавіка 2021 года № 6 (1260)
СЯРЭБРАНЫМ прызёрам чэмпіянату Еўропы па спартыўнай барацьбе (г. Варшава, Польшча) у вагавой катэгорыі 87 кг стаў студэнт завочнай формы атрымання адукацыі факультэта фізічнага выхавання БДПУ Кірыл Маскевіч. Віншуем спартсмена і яго трэнера – выкладчыка кафедры фізічнага выхавання і спорту Элбека Худайназаравіча Тажыева. Так трымаць!
ЗБОРНАЯ БДПУ заваявала бронзавы медаль першых у гісторыі Рэспубліканскай універсіяды спаборніцтваў па хакеі з шайбай. Гэта добры рэзультат, калі ўлічыць, што на працягу турніру нашы спартсмены ўступілі толькі аднаму саперніку – пераможцы спаборніцтваў – зборнай БДУФК. Спецыяльнай узнагароды арганізатараў удастоены абаронца каманды БДПУ Канстанцін Адзінец. З удалым пачынам!
19 красавіка 2021 года № 5 (1259)
СТУДЭНТЫ факультэта фізічнага выхавання сталі пераможцамі і прызёрамі чэмпіянату Рэспублікі Беларусь па барацьбе. Ва ўзроставай групе да 23 гадоў 1-е месца занялі: Эльдар Гасанаў, Ілья Юдчыц (барацьба грэка-рымская), Ганна Вагер (барацьба жаночая), Уладзіслаў Кайко і Аркадзь Пагасян (барацьба вольная). На другім месцы – Аляксей Кухарчык (барацьба вольная). Так трымаць!
НА РЭСПУБЛІКАНСКІХ спаборніцтвах па армрэслінгу ў праграме першынства Рэспублікі Беларусь сярод юнакоў і дзяўчат спартсмены БДПУ вызначыліся двойчы. Па-першае, заваявалі срэбра ў складзе зборнай г. Мінска. Па-другое, занялі другое месца сярод каманд устаноў вышэйшай адукацыі краіны. Акрамя таго, прадстаўнікі БДПУ праявілі сябе і ў індывідуальным заліку. Так, у вагавой катэгорыі да 50 кг перамагла студэнтка 3-га курса факультэта сацыяльна-педагагічных тэхналогій Алеся Кірыльчык, а трэцім у вагавой катэгорыі да 75 кг стаў прадстаўнік фізіка-матэматычнага факультэта Мікалай Брацікаў.
Віншуем студэнтаў і іх трэнераў – інструктара па фізкультуры Студгарадка БДПУ Міхаіла Віктаравіча Буката і загадчыка кафедры фізічнага выхавання і спорту Алега Віктаравіча Хіжэўскага!
30 сакавіка 2021 года № 4 (1258)
НА СПАРТЫЎНАЙ арэне «BOK Sports Hall» горада Будапешт (Венгрыя) прайшоў Еўрапейскі алімпійскі кваліфікацыйны турнір па вольнай барацьбе, падчас якога барцы разыгралі дванаццаць пуцёвак у японскі Токіа. З радасцю паведамляем, што магістрант факультэта фізічнага выхавання БДПУ Дзяніс Храмянкоў стаў пераможцам гэтага прэстыжнага турніру ў сваёй вагавай катэгорыіі і тым самым заваяваў ліцэнзію на ўдзел у Алімпійскіх гульнях-2021. Віншуем прадстаўніка alma mater з поспехам і жадаем яму бліскучага выступлення!
БДПУ – чэмпіён Рэспубліканскай універсіяды-2021! На гэты раз – па міні-футболе сярод жаночых каманд. За права ўзняцца на вышэйшую прыступку п’едэстала ў фінальным паядынку змагаліся каманды БДПУ і ГрДУ. Ніякай іншай задачы, акрамя перамогі, трэнеры зборнай alma mater С.А. Траско і В.К. Мухляда перад сваімі падапечнымі не ставілі. І футбалісткі з самага пачатку гульні ўпэўнена рухаліся да пастаўленай мэты. Галоўнай гераіняй дня стала капітан каманды Анастасія Новікава, якая забіла два галы і тым самым забяспечыла зборнай такі жаданы тытул чэмпіёна. Па выніках спаборніцтваў акрамя кубка і залатых медалёў футбалісткі БДПУ былі ўдастоены спецыяльных узнагарод ад арганізатараў. Лепшым абаронцам турніру прызнана Лізавета Балацянава, а спецыяльны прыз Беларускай асацыяцыі студэнцкага спорту «За лепшую тэхніку» атрымала Анастасія Новікава. Да новых перамог!
РЭКТАР універсітэта А.І. Жук уручыў граматы Беларускай асацыяцыі студэнцкага спорту старшым выкладчыкам факультэта фізічнага выхавання Т.В. Харашылавай і С.А. Траско за актыўны ўдзел у папулярызацыі фізічнай культуры і спорту сярод студэнтаў устаноў вышэйшай адукацыі Рэспублікі Беларусь.
Нагадаем, што Таццяна Віктараўна з’яўляецца трэнерам жаночай зборнай БДПУ па баскетболе, і каманда пад яе кіраўніцтвам двойчы станавілася чэмпіёнам і чатыры разы – сярэбраным прызёрам Рэспубліканскай студэнцкай баскетбольнай лігі. Сяргей Аркадзьевіч, у сваю чаргу, узначальвае мужчынскія і жаночыя зборныя БДПУ па футболе, міні-футболе і гандболе. Яго падапечныя таксама неаднаразова станавіліся пераможцамі і прызёрамі Рэспубліканскай універсіяды.
9 сакавіка 2021 года № 3 (1257)
У ПЕРАДАПОШНІ дзень лютага на Мінскай гарадской лыжаролернай трасе ў сталічным мікрараёне Вяснянка прайшло рэспубліканскае спартыўнамасавае мерапрыемства «Усебеларуская студэнцкая лыжня-2021». У біятлоннай і лыжнай эстафетных гонках прынялі ўдзел больш за 20 каманд універсітэтаў краіны. Падтрымаць танкаўцаў прыехаў асабіста рэктар БДПУ А.І. Жук, а таксама супрацоўнікі СК «Педагог», студэнты ФФВ. Добрая фізічная форма спартсменаў і шчырая вера балельшчыкаў у іх сілы дапамаглі нашай зборнай заняць ганаровае трэцяе месца ў лыжнай эстафеце. Так трымаць!
СТУДЭНТКІ факультэта фізічнага выхавання БДПУ прынялі ўдзел у першынстве Рэспублікі Беларусь па самба на базе Рэспубліканскага цэнтра алімпійскай падрыхтоўкі «Стайкі». За месца на п’едэстале змагаліся больш як 150 спартсменаў. Выдатна праявіла сябе першакурсніца ФФВ Паліна Граматнева. У яе адразу два першыя месцы (вагавая катэгорыя 80 кг) – сярод дзяўчат і сярод юніёрак. Трэцяе месца таксама ў прадстаўніцы нашага ўніверсітэта – студэнткі 1-га курса Аляксандры Козел (59 кг).
У мінскім Палацы спорту прайшоў чэмпіянат Беларусі па спартыўным і баявым самба. На працягу двух дзён адзінаборцы з усёй краіны змагаліся за права звацца мацнейшымі. Прыемна канстатаваць, што срэбра ў сваіх вагавых катэгорыях заваявалі студэнткі ФФВ БДПУ Паліна Граматнева (80 кг) і Вера Гарэлікава (65 кг). Віншуем спартсменак і іх трэнера – загадчыка кафедры фізічнага выхавання і спорту Алега Віктаравіча Хіжэўскага.
ЗАВЯРШЫЛІСЯ спаборніцтвы Рэспубліканскай універсіяды-2021 па міні-футболе сярод мужчынскіх каманд. Паколькі зборная нашага ўніверсітэта была адной з асноўных прэтэндэнтак на перамогу, то лёс залатой узнагароды вырашаўся, як і прадбачылі спецыялісты, у фінальным паядынку з удзелам футбалістаў БДПУ. У выніку напружанай барацьбы танкаўцам сёлета пакарыўся сярэбраны медаль. Лепшым іграком турніру прызнаны Іван Ноўскі. Віншуем каманду і трэнерскі штаб з дастойным выступленнем!
25 лютага 2021 года № 2 (1252)
Студэнты нашага ўніверсітэта пачалі 2021 год з паспяховага выступлення на чэмпіянаце Рэспублікі Беларусь па вольнай барацьбе. Золата заваявалі магістранты факультэта фізічнага выхавання Раман Чытадзэ і Дзяніс Храмянкоў. Сярэбранымі прызёрамі сталі таксама прадстаўнікі ФФВ БДПУ – чацвёртакурсніца Юлія Пісарэнка, трэцякурснікі Аркадзь Пагасян і Ганна Вагер. Бронзавая ўзнагарода – у студэнта 1-га курса Уладзіслава
Кайко. Так трымаць!
18 студзеня 2021 года № 1 (1255)
РЭЗУЛЬТАТЫЎНЫМ для прадстаўнікоў БДПУ стаў удзел у Кубку свету па спартыўнай барацьбе, які праходзіў у сталіцы Сербіі Бялградзе. Так, у фінальным паядынку за першае месца ў вагавай катэгорыі 87 кг свайго саперніка адолеў студэнт завочнай формы атрымання адукацыі факультэта фізічнага выхавання Кірыл Мацкевіч. Віншуем з залатым медалём Кірыла і яго трэнера – выкладчыка кафедры фізічнага выхавання і спорту Элбека Худайназаравіча Тажыева! Срэбра ў асабістым заліку заваяваў на спаборніцтвах па вольнай барацьбе магістрант ФФВ Дзяніс Храмянкоў, які выступаў у катэгорыі 125 кг. Так трымаць! У адным кроку ад п’едэстала спыніўся студэнт 3-га курса ФФВ Аркадзь Пагасян. На гэты раз у спартсмена ганаровае 4-е месца.
ЖАНОЧАЯ зборная БДПУ – чэмпіён Рэспубліканскай студэнцкай баскетбольнай лігі-2020! Нельга пераацаніць значнасць такой перамогі і яе важкі ўклад у медалёвую скарбонку alma mater. Поспех спартсменак падмацаваны яшчэ і тым, што дзве прадстаўніцы нашай каманды ўдастоіліся ажно трох спецыяльных узнагарод Беларускай федэрацыі баскетбола. Гэта – Кацярына Рыбалка (лепшы ігрок турніру) і Анастасія Сушчык (лепшы ігрок абароны і ўладальніца прыза глядацкіх сімпатый).
РЭСПУБЛІКАНСКАЯ ўніверсіяда па баскетболе 3х3 сярод жаночых каманд у мінулым годзе праводзілася ўпершыню. Таму ўвайсці ў першую ў гісторыі тройку лідараў марыла кожная з 12 каманд–удзельніц спаборніцтва. Тым не менш у фінале сустрэліся мацнейшыя – зборныя БДПУ і ГрДУ. Па выніках супрацьстаяння баскетбалісткі нашай установы размясціліся на 2-й прыступцы п’едэстала. Віншуем спартсменак і іх трэнера – старшага выкладчыка кафедры фізічнага выхавання і спорту БДПУ Таццяну Віктараўну Харашылаву!
ЯШЧЭ адна пазітыўная навіна спартыўнага 2020-га. Зборная нашага ўніверсітэта стала сярэбраным прызёрам Рэспубліканскай гандбольнай лігі сярод мужчынскіх каманд. Гэты вынік можна назваць сапраўдным прарывам года, бо летась гандбалісты БДПУ займалі толькі 5-ы радок у спісе мацнейшых. Лепшым бамбардзірам турніру стаў ігрок зборнай Аляксандр Сотнік.
Віншуем! Жадаем усім героям сённяшняй падборкі не спыняцца на дасягнутым! Поспехаў у новым, 2021-м, годзе!
30 лістапада 2020 года № 13 (1251)
КАМПЛЕКТ узнагарод рознай вартасці – дзве залатыя, сярэбраная і дзве бронзавыя – такі вынік выступлення студэнтаў факультэта фізічнага выхавання БДПУ на кубку Беларусі па вольнай барацьбе ў Мінску. Гонар alma mater адстойвалі: трэцякурснікі Ганна Вагер і Аркадзь Пагасян (1-е месца), першакурснік Уладзіслаў Кайко (2-е месца), чацвёртакурснік Дзяніс Максімаў і магістрант Раман Чытадзэ (3-е). Так трымаць!
МЕСЦЫ на п’едэстале гонару яшчэ аднаго кубка Беларусі – па грэка-рымскай барацьбе – таксама занялі выхаванцы факультэта фізічнага выхавання БДПУ. Два першыя – Кірыл Маскевіч і Ілья Юдчыц, трэцяе – Дзмітрый Камінскі. Віншуем і ганарымся!
16 лістапада 2020 года № 13 (1251)
ВАРТЫМІ павагі выглядаюць дасягненні спартсменаў БДПУ на спаборніцтвах Рэспубліканскай універсіяды-2020. Пасля пяці гадоў барацьбы, калі танкаўцы спыняліся за адзін-два крокі ад тройкі прызёраў, бронзавая прыступка на п’едэстале гонару зноў пад нашымі нагамі! Адпаведныя Дыплом ІІІ ступені і прызавы кубак рэктару ўніверсітэта, шчыраму прыхільніку спорту і здаровага ладу жыцця А.І. Жуку ўручыў першы намеснік кіраўніка Адміністрацыі Прэзідэнта М.У. Рыжанкоў. На ўрачыстай цырымоніі ўзнагароджання пераможцаў Універсіяды, якая праходзіла на спартыўнай базе Рэспубліканскага дзяржаўнага вучылішча алімпійскага рэзерву, прысутнічалі намеснік міністра адукацыі А.У. Кадлубай, намеснік міністра спорту і турызму А.І. Баравуля, старшыня Беларускай асацыяцыі студэнцкага спорту А.В. Багдановіч, рэктары самых спартыўных універсітэтаў краіны, студэнты ФФВ і факультэта дашкольнай адукацыі БДПУ. У рамках мерапрыемства заслужаныя ўзнагароды таксама атрымалі студэнты БДПУ Вікторыя Пляскач (фізіка-матэматычны факультэт) і Яўген Чычаў (факультэт фізічнага выхавання) – сярэбраныя прызёры анлайн-турніраў па шахматах і кібердысцыпліне «FIFA-20» (адпаведна).
ДРУГОЕ месца на чэмпіянаце свету па самба (г. Нові-Сад, Сербія) – выдатны поспех і цудоўны падарунак да Дня ўніверсітэта студэнткі 2-га курса завочнай формы атрымання адукацыі факультэта фізічнага выхавання Веры Гарэлікавай. Віншуем і ганарымся!
СЯРЭБРАНЫ медаль у рамках праграмы Рэспубліканскай універсіяды заваявала жаночая зборная БДПУ па міні-футболе. У выніковай гульні сезона асноўнымі саперніцамі выхаванак трэнераў Сяргея Аркадзьевіча Траско і Віктара Казіміравіча Мухляды, як і ў мінулыя гады, сталі спартсменкі БДУФК. І хоць сёлета нашым дзяўчатам не пашчасціла і яны прайгралі фінальную сустрэчу, аднак мы ўпэўнены, што ў наступным годзе футбалісткі БДПУ зноў стануць першымі і вернуць страчанае золата. Віншуем з дастойным выступленнем усю каманду і асабіста – Камілу Буткевіч, якая прызнана лепшым варатаром турніру!
І ЯШЧЭ адна футбольная навіна. На радасць балельшчыкам БДПУ футбалісты alma mater пад кіраўніцтвам трэнераў С.А. Траско і В.К. Мухляды заваявалі пачэснае 3-е месца ў фінале Рэспубліканскай студэнцкай футбольнай лігі сярод мужчынскіх каманд, абыграўшы саперніка – зборную БНТУ з разгромным лікам 7:1. А калі ўлічыць, што летась каманда БДПУ ў турнірнай табліцы займала толькі 8-ы радок, то бронзавая ўзнагарода-2020 – сведчанне здаровых амбіцый і добрай фізічнай формы танкаўцаў. Па выніках турніру лепшым паўабаронцам спаборніцтваў прызнаны студэнт ФФВ БДПУ Мікіта Макараў. Так трымаць!
23 кастрычніка 2020 года № 12 (1250)
СТУДЭНТА факультэта фізічнага выхавання БДПУ Даніэла Мукетэ без перабольшвання можна назваць зоркай адзінаборстваў. Не пералічыць, колькі разоў «Н» віншаваў спартсмена з чарговай перамогай. Вось і нядаўна Даніэл заняў 1-е месца ў вазе да 100 кг на кубку Беларусі па дзюдо ў Магілёве. Віншуем і ганарымся!
СВОЙ унёсак – на гэты раз сярэбраны – у медалёвую скарбонку БДПУ зрабіла жаночая зборная ўніверсітэта па футболе на чале са сваім нязменным трэнерам Сяргеем Аркадзьевічам Траско. Акрамя каманднай асабістую ўзнагароду ад арганізатараў спаборніцтваў атрымала Ганна Кашынская як лепшая абаронца турніру. Некалькі фактаў. У фінал спаборніцтваў Рэспубліканскай студэнцкай футбольнай лігі 2020 года сярод жаночых каманд спартсменкі БДПУ выйшлі, не страціўшы ніводнага ачка. Як і летась, у барацьбе за золата нашым дзяўчатам супрацьстаялі футбалісткі БДУФК. Падтрымаць зборную ўніверсітэта падчас вырашальнай гульні на стадыён БДПУ прыехаў рэктар БДПУ Аляксандр Іванавіч Жук.
Новых поспехаў і перамог.
5 кастрычніка 2020 года № 11 (1249)
ЗАВЯРШЫЛІСЯ спаборніцтвы па лёгкай атлетыцы – самым масавым відзе спорту Рэспубліканскай універсіяды. За месцы на п’едэстале ў 24 дысцыплінах змагаліся каманды 30 устаноў вышэйшай адукацыі краіны. Свой унёсак у медалёвую скарбонку БДПУ зрабілі: Павел Мялешка і Ганна Каліноўская (адпаведна золата і срэбра ў кіданні кап’я), Таццяна Рамановіч (срэбра ў кіданні молата), Юлія Коцікава, Юлія Занько, Марыя Труцько, Кацярына Бабук (срэбра ў эстафеце 4 × 400 м), Анжаліка Сізова (бронза ў бегу з бар’ерамі на 100 м), Алена Савасценя (бронза ў спартыўнай хадзьбе на 5000 м). Па рашэнні Галоўнай судзейскай калегіі спаборніцтваў спецыяльным прызам Універсіяды ўзнагароджаны студэнт факультэта фізічнага выхавання Павел Мялешка, які абнавіў рэкорд у кіданні кап’я – 81,15 м.
АДРАЗУ два другіх месцы ў анлайн-турнірах па шахматах заваявалі студэнты БДПУ Вікторыя Пляскач (фізіка-матэматычны факультэт) і Яўген Чычаў (факультэт фізічнага выхавання). Спаборніцтвы, арганізатарамі якіх з’яўляліся Беларуская асацыяцыя студэнцкага спорту, ГА «Беларуская федэрацыя шахмат» і РГА «Беларуская федэрацыя кіберспорту», былі прымеркаваныя да Міжнароднага дня студэнцкага спорту.
ЗБОРНАЯ ўніверсітэта прыняла ўдзел у І адкрытым чэмпіянаце Рэспублікі Беларусь па шахматах сярод карпарацый. Прадстаўнікі БДПУ, якія ў адпаведнасці з дрэс-кодам былі апрануты ў майкі з сімволікай alma mater, на працягу двух дзён дэманстравалі сваё майстэрства ў гульні інтэлектуалаў. І хоць 7-е месца не зусім той вынік, на які разлічвалі нашы спартсмены, аднак арганізатары мерапрыемства – ГА «Беларуская федэрацыя шахмат» і ГАА «Школа шахмат» – перакананы, што эфектыўны трэніровачны працэс і нацэленасць на перамогу здольныя забяспечыць прадстаўнікам БДПУ як мінімум месца ў прызавой тройцы. Так што ў наступным чэмпіянаце нам ёсць да чаго імкнуцца. І гэта выдатна!
УРАМКАХ правядзення Рэспубліканскай універсіяды мужчынская зборная БДПУ па футболе і жаночая па валейболе выйшлі ў фінальную стадыю сваіх турніраў, дзе пазмагаюцца за прызавыя месцы на п’едэстале гонару
21 лютага 2020 года № 2 (1240)
Пачатак лютага прынёс у БДПУ радасныя весткі са спартыўных арэн свету. Так, выпускніца факультэта фізічнага выхавання Марына Слуцкая – лідар Нацыянальнай зборнай Беларусі па дзюдо і залаты прызёр ІІ Еўрапейскіх гульняў – заваявала срэбра ў вагавай катэгорыі звыш 78 кг на турніры серыі Вялікага шлема па дзюдо ў Парыжы (Францыя).
Студэнт факультэта фізічнага выхавання Максім Нягода стаў чэмпіёнам Еўропы па грэка-рымскай барацьбе. Да гэтай перамогі спартсмен ішоў паступова. Восенню мінулага года Максім і яго таварышы па камандзе – таксама студэнты ФФВ Дзмітрый Камінскі і Кірыл Маскевіч заваявалі бронзавыя медалі чэмпіянату свету па
грэка-рымскай барацьбе ў Будапешце (Венгрыя).
Яшчэ адна выха-ванка ФФВ Аляксандра Раманоўская, першая ў гісторыі беларускага жаночага фрыстай-
ла чэмпіёнка свету ў лыжнай акрабатыцы, вый-грала этап Кубка свету ў аме-рыканскім Дзір-Вэлі. На-гадаем, што па выніках апы-тання, якое праводзіла газета «Спартыўная панарама», Аляксандра была прызнана лепшай спартсменкай Беларусі 2019 г.
Па выніках фінальных спаборніцтваў Рэспуб-ліканскай Універсіяды вызначыўся чэмпіён па дзюдо-2019. Ім стала каманда БДПУ з ліку студэнтаў ФФВ і ІІА пад кіраўніцтвам трэнераў А. У. Катлоўскага і А. В. Хіжэўскага! У асабістым заліку перамогу святкавалі Карына Шут, Марыя Кандрацьева, Даніэл Мукетэ, Аляксандр Сідорык. Другое месца занялі Кацярына Мацулевіч і Багдан Войтэк (двойчы: у вагавай катэгорыі 100+ і ў абсалютнай вагавай катэгорыі). Дзяніс Муранькоў і Анастасія Казека ўзняліся на трэцяе. Да таго ж члены каман-ды БДПУ былі адзначаны спецыяльнымі прызамі «За лепшую тэхніку» (Даніэл Мукетэ) і «За волю да перамогі» (Кацярына Шут). Віншуем і ганарымся!
Чацвёрты год запар жаночая зборная БДПУ па футболе ўздымаецца на другую прыступку п’едэстала гонару Рэспубліканскай студэнцкай футбольнай лігі. Віншуем спартсменак і іх трэнера – старшага выкладчыка кафедры спартыўна-педагагічных дыс-цыплін С. А. Траско, а таксама абаронцу каманды Ана-стасію Новікаву, якую арганізатары назвалі «Лепшым іграком турніру».
СПАРТЫЎНАЕ ЖЫЦЦЁ – З ТРЫУМФАМ!
Напярэдадні свайго 105-годдзя БДПУ ярка і дынамічна адзначыў свята ўсіх аматараў спорту і здаровага ладу жыцця – «Трыумф–2019». У рамках мерапрыемства адбылося падвядзенне вынікаў 64-й і ўрачыстае адкрыццё юбілейнай 65-й круглагадовай спартакіяды сярод студэнтаў, прайшло ўзнагароджанне лепшых зборных каманд інтэрнатаў і структурных падраздзяленняў alma mater, на сцэну былі запрошаны людзі, якія з’яўляюцца спартыўным гонарам БДПУ і ўсёй краіны.
Як адзначыў рэктар універсітэта А. І. Жук, «Трыумф» – гэта добрая традыцыя, якая мацуе сяброўскія стасункі паміж членамі ка-лектыву нашай установы. Яна заснавана на аднолькавым разуменні каштоўнасці здароўя і гатоўнасці яго падтрымліваць, з’яўляецца сведчаннем таго, што БДПУ – не толькі друж-ная, а і спартыўная сям’я. У сваім выступленні Аляксандр Іванавіч падкрэсліў: «Мы актыўна падтрымліваем студэнтаў-спартсменаў, па-стаянна абнаўляем матэрыяльную базу, ствараем усе ўмовы для правядзення трэніровач-нага працэсу і заняткаў па фізічным выхаванні. Менавіта таму ва ўніверсітэце вучацца амаль 150 членаў нацыянальных зборных, а конкурс на шэраг спартыўных спецыяльнасцей ужо трэці год запар складае больш за 10 чалавек на месца. Вось і сёлета на першы курс БДПУ паступіла звыш 100 спартсменаў-разрад-нікаў, майстроў і кандыдатаў у майстры спорту. Яны – наша будучая спартыўная змена».
Пад апладысменты прысутных на сцэну выйшлі прадстаўнікі ўсіх факультэтаў і інстытутаў – удзельнікі ўрачыстага парада. І разам з імі ўзняліся дванаццаць сцягоў, адзін з якіх – галоўны на гэтым мерапрыемстве – Сцяг спар-такіяды БДПУ! Цырымонія ўзнагароджання пачалася. Сёлета яе праводзілі рэктар універсі-тэта А. І. Жук і ганаровыя госці мерапрыемства – старшыня Беларускай асацыяцыі студэнц-кага спорту, Алімпійскі чэмпіён 2008 г. у веславанні на байдарках і каноэ, сярэбраны прызёр Алімпіяды–2012 А. В. Багдановіч, член тэхнічнага камітэта Міжнароднага саюза біятланістаў, 11-разовая чэмпіёнка свету па летнім біятлоне В. В. Назарава, Генеральны сакратар Беларускай асацыяцыі студэнцкага спорту, майстар спорту СССР па дзюдо В. Г. Карнавушанка.
Паводле вынікаў чэмпіёнам спартакіяды БДПУ 2018/2019 навучальнага года ў першай групе стаў фізіка-матэматычны факультэт, 2-е месца заняў факультэт прыро-дазнаўства, а бронзавым прызёрам прызнаны гістарычны факультэт. Дэканам названых факультэтаў і выкладчыкам, адказным за фізічнае выхаванне студэнтаў, былі ўручаны дыпломы адпаведнай ступені, кубкі і камплекты спартыўнай формы ад рэктарата ўні-версітэта. Ганаровай граматай і камплектам спартыўнай формы быў адзначаны факультэт фізічнага выхавання, які выступае па-за конкурсам, бо з’яўляецца флагманам спартыўна-га жыцця БДПУ.
Перамогу ў другой групе святкаваў факультэт эстэтычнай адукацыі. Другое і трэцяе месца занялі адпаведна Інстытут інклюзіўнай адукацыі і факультэт сацыяльна-педагагічных тэхналогій. Прадстаўнікі структур атрымалі дыпломы, кубкі і спецыяльныя прызы ад рэктарата БДПУ.
Заслужаныя ўзнагароды былі ўручаны яшчэ адной групе трыумфатараў – пераможцам
і прызёрам спартакіяды сярод работнікаў БДПУ, у якой сёлета прымалі ўдзел звыш 400 чалавек. Дыпломы, кубкі, а таксама каштоўныя падарункі ім уручылі першы прарэктар універсітэта С. І. Копцева і старшыня прафсаюзнага камітэта работнікаў БДПУ І. А. Вабішчэвіч. Такім чынам, золата заваявала зборная супрацоўнікаў спартыўнага клуба, цэнтра студэнцкай творчасці і ўпраўлення выхаваўчай работы з моладдзю, сярэбраным прызёрам стала каманда факультэта прыродазнаўства, бронзавым – бібліятэка БДПУ. Спецыяльны прыз ад прафкама атрымала зборная каманда факультэта фізічнага выхавання, якая ўдзельнічае ў спартакіядзе па-за конкурсам.
З мэтай далучэння моладзі да здаровага ладу жыцця і арганізацыі вольнага часу па месцы пражывання студэнтаў у на-шай alma mater праводзіцца спартакіяда і сярод інтэрнатаў студгарадка БДПУ. Пераможцамі і прызёрамі ў ёй сталі зборныя інтэрнатаў № 6 (1-е месца), № 2 (2-е месца), № 5 (3-е месца). Загадчыкам інтэрнатаў і кіраўнікам спартыўных сектараў былі ўручаны дыпломы, кубкі, дартс і набор для тэніса ад рэктарата БДПУ.
У намінацыі «Спартыўны гонар БДПУ» пераможцы не вызначаюцца. У ёй па тра-
дыцыі вітаюць студэнтаў, якія прадстаўляюць наш універсітэт на рэспубліканскай і міжна-
роднай арэнах. Пра іх дасягненні ў розных відах спорту ведаюць і ганарацца не толькі танкаўцы. Гэта – барцы Даніэл Мукетэ (дзюдо), Марыя Кандрацьева (самба), Кірыл Маскевіч (грэка-рымская), Юлія Пісарэнка (вольная), Антон Сачыловіч (дзюдо), Максім Нягода (грэка-рымская), а таксама прадстаўнікі гульнёвых відаў спорту Таццяна Чысцік (футбол), Любоў Вядзьгун (баскетбол), Канстанцін Цюшкевіч (валейбол), Сняжана Сняжко (гандбол). Кожны з іх атрымаў падарунак і, у адпаведнасці з загадам рэктара, матэрыяльнае ўзнагароджанне – 100 рублёў.
Заканчэнне заўсёды з’яўляецца адначасова і пачаткам. Афіцыйны старт спартакіядзе новага навучальнага года даў рэктар універсітэта А. І. Жук. Да сустрэчы на пляцоўках юбілейнай – 65-й спартакіяды!
Алена РАГІЛЕВІЧ, Анастасія ЦІШКОВА
Два золата і срэбра – такі вынік удзелу студэнтаў факультэта фізічнага выхавання ў Адкрытым Кубку Рэспублікі Беларусь па дзюдо ў Магілёве. Упэўненай перамогай завяршыліся выступленні Багдана Войціка (100+) і Антона Сачыловіча (100 кг). На другую прыступку п’едэстала гонару ўзнялася Кацярына Мацулевіч (48 кг). Віншуем!
І яшчэ адна бліскучая перамога на рахунку студэнта факультэта фізічнага выхавання. На VII Сусветных ваенных гульнях (г. Ухан, КНР) дзюдаіст Даніэл Мукетэ заваяваў залаты медаль у вазе да 100 кг. Адзначым, што спаборніцтва праводзіцца раз у чатыры гады і сёлета сабрала больш за 9 тыс. спартсменаў са 109 краін свету. Ведай нашых!
У рамках святкавання 105-годдзя БДПУ 18 лістапада пройдуць спаборніцтвы па
плаванні пад дэвізам «Стартуем разам!». У склад кожнай з 5 каманд уключаны прадстаўнікі
3 пакаленняў. Пачнуць эстафету навучэнцы-выхаванцы Мінскай абласной СДЮШАР па плаванні, працягнуць студэнты БДПУ, і завяршаць заплыў выкладчыкі і супрацоўнікі alma mater на чале з рэктарам універсітэта А. І. Жуком. Сімвалічна, што ўсяго на старт выйдуць 105 чалавек. Пачатак спаборніцтваў у 16.00.
24 верасня 2019 года № 11 (1232)
ЮБІЛЕЙНЫ ЗАБЕГ У ЮБІЛЕЙНЫ ГОД
Адно з самых маштабных спартыўнах мерапрыемстваў краіны — Мінскі паўмарафон — з кожным годам прыцягвае ўсё больш лёгкаатлетаў і прыхільнікаў здаровага ладу жыцця. Сёлета 15 верасня на яго дыстанцыі праверыць свае сілы выйшла 40 тысяч чалавек — лічба ўражвае, ці не праўда? Сярод іх каманда alma mater вылучалася не толькі колькасцю (1 744 удзельнікі), але і карпаратыўнай згуртаванасцю, арганізаванасцю, крэатыўнасцю. Нашых бегуноў лёгка было пазнаць па знешніх атрыбутах: аднолькавая форма, універсітэцкая сімволіка, сцягі і плакаты. А яшчэ — па асаблівай энергетыцы, якая ўласціва моцнай дружнай сям’і.
Для спартсменаў-танкаўцаў на чале з рэктарам БДПУ Аляксандрам Іванавічам Жуком, які ў пяты раз разам з камандай пераадолеў дыстанцыю ў пяць з паловай кіламетраў, сёлетні забег меў сімвалічнае значэнне. Вядома, кожны імкнуўся паставіць асабісты рэкорд, але напярэдадні юбілею ўніверсітэта прысвячаў яго любімай alma mater. І памятныя медалі, якія нашы бегуны атрымалі на фінішы, цяпер будуць асацыіравацца не толькі з пятым па ліку марафонам, але і са сто пятым днём нараджэння БДПУ.
Асабліва моцнае ўражанне ўдзел у такім маштабным мерапрыемстве аказаў на першакурснікаў, якія з радасцю далучыліся да адной з лепшых спартыўных традыцый універсітэта. Студэнтка 1-га курса Інстытута інклюзіўнай адукацыі Паліна Балук эмацыйна распавядае: “Для мяне Мінскі паўмарафон — гэта знакавая падзея. Я з гонарам і вялікай радасцю прыняла ў ім удзел. Вялікі дзякуй арганізатарам за тое, што змагла адчуць еднасць у імкненні да спорту і здароўя не толькі з інстытутам і ўніверсітэтам, але і з усёй краінай. Гэта грандыёзнае свята, якое надае бадзёрасці і натхняе на працу над сваёй фізічнай формай. Абавязкова выйду на старт у наступным годзе!” І сапраўды, той, хто аднойчы адчуў марафонскі адрэналін, напэўна захоча браць удзел у забегах зноў і зноў. Так здарылася са студэнткай выпускнога курса факультэта эстэтычнай адукацыі Крысцінай Тарасевіч: “У чацвёрты раз Мінскі паўмарафон акунуў мяне ў атмасферу сапраўднага свята спорту. Масава, ярка і неймаверна пазітыўна. Выдатная арганізацыя, мора ўсмешак, новыя знаёмствы і незабыўныя ўражанні — усё гэта здольна зрабіць шчаслівым любога чалавека”.
Для многіх танкаўцаў першы паўмарафон стаў адпраўной кропкай для сур’ёзных заняткаў бегам. Сваёй гісторыяй дзеліцца старшы выкладчык кафедры ўсеагульнай гісторыі і методыкі выкладання гісторыі Віталій Альгімантавіч Ёцюс: “Восенню 2015-га калегі прапанавалі мне паўдзельнічаць у карпаратыўным забегу на 5,5 км. Гэта было цяжка, бо апошні раз я бегаў на ўроках фізкультуры ў школе. І тым не менш менавіта гэтая падзея падштурхнула мяне да рэгулярных трэніровак. Вячэрнія прабежкі пачынаў з кіламетра і паступова павялічваў дыстанцыю. Так, у 2016-м падчас паўмарафону я ўжо адолеў 10,5 км. Бег стаў часткай майго жыцця. Для больш прадуктыўных трэніровак пачаў набываць прафесійны абутак, у якім зручна займацца. Тры гады за- пар выходжу на дыстанцыю 21,1 км. У сёлетнім марафоне па аб’ектыў- ных прычынах палепшыць леташні вынік мне не ўдалося, але гэта стала дадатковым стымулам для інтэнсіўных трэніровак. Марафон для мяне — не толькі цудоўная магчымасць актыўнага адпачынку, але і найлепшае сведчанне таго, што “педагогі — за здаровы лад жыцця”.
А вось намеснік дэкана па вучэбнай рабоце факультэта прыродазнаўст- ва Мікалай Леанідавіч Страха прызнаецца, што бегаў заўсёды, колькі сябе памятае: “У дзяцінстве немагчыма было не бегаць. Вясковае жыццё дзіцяці, бацькі якога трымалі вялікую гаспадарку, патрабавала быць рухавым. Ды і наогул, жыццё на Палессі вымушала ўвесь час пераадольваць даволі вялікія адлегласці. У суседнюю вёску ці нават райцэнтр, да службовых сельскагаспадарчых надзелаў майго бацькі — пешшу, а дакладней, подбегам. Потым, калі ўжо быў студэнтам Брэсц- кага педагагічнага інстытута, пастаянна браў удзел у студэнцкіх спаборніцтвах. Бегаў дыстанцыі да 10 кіламетраў. У войску без заняткаў па фізічнай падрыхтоўцы не абыходзіўся ні адзін дзень, а “марш-кідок” на пяць кіламетраў быў звычайнай справай. Падчас навучання ў аспірантуры БДПУ жыў у інтэрнаце № 5, што на Вузаўскім завулку, а там побач — стадыён “Лакаматыў”, сённяшні стадыён БДПУ. Кожная раніца пачыналася з прабежкі… Цяпер недалёка ад гэтага месца знаходзіцца і мой дом. Так што як толькі адчуваю, што губляю сваю звычайную форму і набіраю вагу, тут жа адпраўляюся на бегавыя дарожкі роднага стадыёна.
Пераадоленне дыстанцыі ў пяць кіламетраў даецца мне лёгка, таму на сёлетнім паўмарафоне запісаўся на дзесяць з паловай. Самаадчуванне на фінішы было цудоўным, так што вырашыў разам з дружнай камандай БДПУ прабегчы яшчэ і 5,5 км. Ну, а ў наступным годзе буду спрабаваць стаць сапраўдным паўмарафонцам і асіліць 21,1 км”.
Падрыхтавала
Вераніка МАНДЗІК
2 верасня 2019 года (1231)
СТУДЭНТЫ і выпускнікі БДПУ дастойна прадставілі нашу краіну і родны ўніверсітэт на II Еўрапейскіх гульнях. Медалёвую скарбонку Беларусі 7 узнагародамі папоўнілі: Марына Слуцкая (золата, дзюдо “+78” кг), Аляксандр Кокша (золата, самба “–68” кг), Крысціна Ціманоўская (срэбра, бег на 100 м), Уладзіслаў Бурдзь (бронза, самба “–57” кг), Вольга Намазава (бронза, самба “–68” кг), Сцяпан Папоў (бронза, самба “–74” кг), Настасся Сушчык, Марына Івашчанка, Дар’я Магаляс (бронза, баскетбол 3х3). Віншуем і ганарымся!
ПРАДСТАЎНІЦА факультэта фізічнага выхавання Марыя Кандрацьева ўпэўнена перамагла сваіх саперніц на Міжнародным турніры па самба “Мемарыял М. Бурдзікава” (Расія, Кстова, 17–18 жніўня). Двума тыднямі раней спартсменка заваявала бронзавы медаль па дзюдо ў вагавай катэгорыі “+78” кг падчас I чэмпіянату Еўропы па баявых відах спорту, які праводзіўся ў г. Заграб (Рэспубліка Харватыя) пад эгідай Еўрапейскай асацыяцыі ўніверсітэцкага спорту. Малайчына!
ВЯЛІКАЯ і дружная сям’я БДПУ — пастаянны ўдзельнік Мінскага паўмарафону — 15 верасня ў пяты раз прыме ўдзел у карпаратыўным забегу па вуліцах сталіцы. Далучайцеся
да самай крэатыўнай і арганізаванай педагагічнай каманды надыстанцыі 5,5 км! Да сустрэчы на старце!
21 чэрвеня 2019 года № 9 (1230)
ЖАНОЧАЯ каманда БДПУ заняла 1-е месца на Рэспубліканскай універсіядзе па пляжным валейболе. У спаборніцтвах прымалі ўдзел 27 жаночых і 28 мужчынскіх студэнцкіх каманд. У фіналь ным супрацьстаянні студэнткі ФФВ Ганна Князева і Таццяна Холад перамаглі саперніц з Гомельскага дзяржаўнага ўніверсітэта імя Францыска Скарыны, што дазволіла ім уз няцца на вышэйшую прыступку п’едэстала. Віншуем дзяўчат і іх трэнера Аляксандра Пімахіна!
ПАЧАЛАСЯ рэгістрацыя каманд для ўдзелу ў Мінскім 
паўмарафоне-2019. Па традыцыі вялікая і дружная сям’я БДПУ арганізавана выйдзе на старт 15 верасня. Пачатак масавага забегу па цэнтральных вуліцах сталіцы назначаны на 12.30. Dream Team чакае дыстанцыя 5,5 км. Падавайце пісьмовыя заяўкі на ўдзел у Мінскім паўмарафоне ў дэканаты ці ў спартыўны клуб “Педагог”. Можна таксама тэлефанаваць на нумар (17) 327-83-01. Нагадаем, што ў мінулым годзе каманда танкаўцаў на лічвала 1715 чалавек. Паб’ем мінулагоднія рэкорды!
31 мая 2019 года, № 8 (1229)
ПРЫЗЁРАМІ чэмпіянату Еўропы па самба, які днямі завяршыўся ў іспанскім Хіхоне, сталі студэнткі факультэта фізічнага выхавання нашага ўніверсітэта Марыя Кандрацьева (3-е месца ў вазе звыш 80 кг) і Карына Шут (3-е месца ў вазе 72 кг), а таксама выпускніца ФФВ БДПУ Вольга Намазава (срэбра, 68 кг).
У спаборніцтвах сярод мужчын на п’едэстал гонару ўзняліся яшчэ два выпускнікі alma mater: сярэбраны медаліст, уладальнік прэміі Fair Play за высакароднасць у адносінах да саперніка пасля фінальнай схваткі на Еўрапейскіх гульнях‑2015 Сцяпан Папоў (74 кг) і бронзавы прызёр Уладзіслаў Саяпін (68 кг).
Прыемна адзначыць, што перамогі выхаванцаў БДПУ дазволілі зборнай Беларусі заняць чацвёртае агульнакаманднае месца. Віншуем і ганарымся!
5 сакавіка 2019 года, № 3 (1224)
СКАЖАМ «ДЗЯКУЙ» ТАМУ ДНЮ, ШТО ПАКЛІКАЎ НА ЛЫЖНЮ!
Наш універсітэт заслужана лічыцца адной з самых спартыўных ВНУ краіны. Імкненне да здаровага ладу жыцця праяўляецца і ў тым, што танкаўцы ахвотна бяруць удзел у масавых фізкультурных мерапрыемствах гарадскога і рэспубліканскага маштабу. З уласцівай нам карпаратыўнай еднасцю аматары зімовых відаў спорту выйшлі на трасы “Усебеларускай студэнцкай лыжні-2019”, каб у чарговы раз засведчыць выдатную фізічную форму нашай вялікай і дружнай універсітэцкай сям’і.
Фізкультурна-аздараўленчае свята прайшло 16 лютага на Мінскай гарадской лыжаролернай трасе ў мікрараёне “Вяснянка”. Яно сабрала больш за тысячу студэнтаў з 51 установы вышэйшай адукацыі краіны. У стартах бралі ўдзел таксама іх выкладчыкі, супрацоўнікі і прадстаўнікі адміністрацыі. Праграма спаборніцтваў уключала біятлонную і лыжную эстафетныя гонкі студэнцкіх каманд, а таксама масавыя старты ў лыжных гонках.
Па-сапраўднаму горача было не толькі на лыжні, але і на трыбунах. Больш за 170 студэнтаў нашага ўніверсітэта падтрымлівалі спартсменаў і выкладчыкаў БДПУ, не шкадуючы галасоў і ствараючы святочную атмасферу шчырымі ўсмешкамі.
Пры такой падтрымцы нашы спартсмены проста не маглі падвесці сваіх балельшчыкаў і выступіць дрэнна. Падапечныя трэнера А. У. Холада з годнасцю склалі канкурэнцыю вядучаму спартыўнаму ўніверсітэту краіны ў дзвюх эстафетных гонках. Так, у біятлоннай эстафеце зборная БДПУ заняла 3-е месца, а наша лыжная каманда заваявала сярэбраныя медалі, упусціўшы “золата” толькі на апошніх метрах дыстанцыі.
Для поўнага камплекта не хапала толькі перамогі. Яна здарылася ўжо ў наступным забегу, калі на старт дыстанцыі 1,2 км выйшлі прадстаўнікі Міністэрства адукацыі Рэспублікі Беларусь, а таксама кіраўнікі ўстаноў вышэйшай адукацыі і іх намеснікі. У гонцы не было роўных рэктару БДПУ А. І. Жуку! Пераможцу, а таксама прарэктара па вучэбнай рабоце А. В. Макоўчыка на фінішы гледачы сустракалі бурнымі апладысментамі. Каменціруючы выступленне нашай каманды, Аляксандр Іванавіч адзначыў: “Ва ўсіх спартыўных мерапрыемствах мы стараемся прымаць удзел разам. Разам стартавалі ў Мінскім паўмарафоне, удзельнічалі ў заплывах, сёння — спаборнічалі ў лыжных гонках… Ніякіх кампрамісаў: рэктар павінен быць са сваёй камандай!”
Віншуем удзельнікаў спаборніцтваў з паспяховым выступленнем і жадаем далейшых поспехаў і дасягненняў!
Іван МОРГУН, дырэктар спартыўнага клуба “Педагог”
5 сакавіка 2019 года, № 3 (1224)
МАГІСТРАНТ факультэта фізічнага выхавання БДПУ Юрый Голуб — трыумфатар чэмпіянату свету па лыжных гонках і біятлоне сярод паралімпійцаў. На спаборніцтвах у г. Прынс-Джорджы (Канада) Юрый у тандэме з гайдам Дзмітрыем Будзіловічам здабылі ажно чатыры медалі: у катэгорыі спартсменаў са слабым зрокам яны тройчы ўздымаліся на верхнюю прыступку п’едэстала, а па выніках лыжнага спрынту дадалі да залатых медалёў “серабро” чэмпіянату. Віншуем і ганарымся!
ЧЭМПІЁНКА свету па фрыстайле Аляксандра Раманоўская працягвае залатую серыю выступленняў. У суперфінале этапу Кубка свету па лыжнай акрабатыцы ў Маскве 5-курсніца факультэта фізічнага выхавання БДПУ (завочная форма атрымання адукацыі) заявіла самы складаны скачок і здабыла ўпэўненую перамогу, не пакінуўшы шанцаў саперніцам. Так трымаць!
ВІНШУЕМ студэнта 2-га курса факультэта фізічнага выхавання Аляксандра Сідорыка з “серабром” этапу Кубка Еўропы па дзюдо сярод юніёраў да 21 года, які праходзіў у Санкт-Пецярбургу (Расія). У фінале спаборніцтваў Аляксандр (вагавая катэгорыя да 90 кг) прадэманстраваў волю да перамогі, саступіўшы роўнаму саперніку толькі ў дабаўлены час.
15 лютага 2019 года, № 2 (1223)
ПЯЦІКУРСНІЦА факультэта фізічнага выхавання (завочная форма атрымання адукацыі) Аляксандра Раманоўская заваявала «золата» чэмпіянату свету па лыжнай акрабатыцы! «Цудоўны фінальны скачок у амерыканскім Дзір-Вэлі не пакінуў ніякіх суменнняў: ты лепшая!» — сказаў беларускай фрыстайлістцы Прэзідэнт краіны А. Р. Лукашэнка.
Год назад Аляксандра Раманоўская і чэмпіён Паралімпіяды ў Пхёнчхане Юрый Голуб далі эксклюзіўнае інтэрв’ю карэспандэнту «Н». А тым, хто яго прапусціў, прапануем знайсці па спасылцы: https://issuu. com/nastaunik/docs/1208
У ГРОДНЕ 7–9 лютага былі разыграны медалі першынства Рэспублікі Беларусь па грэка-рымскай барацьбе. За месцы на п’едэстале ў розных вагавых катэгорыях змагаліся 140 спартсменаў ва ўзросце да 23 гадоў, якія прадстаўлялі ўсе рэгіёны краіны.
Кубак першынства ў камандным заліку заваявалі прадстаўнікі Мінскай вобласці. Прыемна адзначыць, што два «золаты» і «срэбра» ў камандную скарбонку ўнеслі выхаванцы выкладчыка кафедры спартыўна-педагагічных дысцыплін факультэта фізічнага выхавання БДПУ Элбека Тажыева — другакурснікі ФФВ Антон Сахно (1-е месца, 77 кг), Дзмітрый Камінскі (1-е месца, 97 кг) і Кірыл Маскевіч (2-е месца, 87 кг). Так трымаць!
У МАГІЛЁВЕ на чэмпіянаце Рэспублікі Беларусь па дзюдо (7–9 лютага) прадстаўнікі факультэта фізічнага выхавання БДПУ сталі пераможцамі і прызёрамі ў розных вагавых катэгорыях.
«Золата» заваяваў першакурснік Даніэл Мукетэ (вагавая катэгорыя да 100 кг); «бронзу» — студэнт 2-га курса Антон Сачыловіч (–100 кг) і лабарант вучэбна-практычнай лабараторыі фізічнай культуры І. Р. Навумаў (–81 кг). Акрамя таго, Іван Рыгоравіч выканаў нарматыў майстра спорту.
ПА ВЫНІКАХ правядзення Рэспубліканскай універсіяды?2018 БДПУ заняў IV агульнакаманднае месца сярод устаноў вышэйшай адукацыі краіны.
У мінулым годзе зборныя ўніверсітэта сталі пераможцамі:
Рэспубліканскай універсіяды па барацьбе самба (жанчыны), Рэспубліканскай універсіяды па футзале (жанчыны), Рэспубліканскай студэнцкай гандбольнай лігі сярод мужчынскіх каманд,
і прызёрамі Рэспубліканскай універсіяды па:
баскетболе (жанчыны, 2-е месца), вольнай барацьбе (жанчыны, мужчыны, 2-е месца), барацьбе самба (мужчыны, 2-е месца), валейболе (жанчыны, 2-е месца), дзюдо (мужчыны, 2-е месца), футболе (жанчыны, 2-е месца), гандболе (жанчыны, 3-е месца), футболе ў залах (мужчыны, 3-е месца).
Іван МОРГУН, дырэктар спартыўнага клуба «Педагог»
30 лістапада 2018 года, № 15 (1219)
Вартымі павагі выглядаюць дасягненні спартсменаў БДПУ на спаборніцтвах Рэспубліканскай універсіяды. Не паспелі сціхнуць фанфары ў гонар залатога прызёра ў настольным тэнісе — студэнткі Інстытута псіхалогіі Дар’і Трыгалас і яе трэнера — выкладчыка кафедры фізічнага выхавання і спорту Г. Р. Ярца, як з’явілася новая нагода для гонару. Днямі наш універсітэт праславіў «сярэбраны дубль» — жаночая і мужчынская зборныя БДПУ па дзюдо. У асабістым заліку выхаванцы выкладчыкаў alma mater — трэнераў А. У. Катлоўскага і А. В. Хіжэўскага ажно 5 разоў узнімаліся на верхнюю прыступку п’едэстала гонару, двойчы — на другую і яшчэ пяць — на трэцюю. «Золата» для каманднага выніку здабылі студэнты факультэта фізічнага выхавання Марыя Кандрацьева (у вазе звыш 78 кг і ў абсалютнай вагавай катэгорыі), Карына Шут (–78 кг), Аляксандр Сідорык (–90 кг), Багдан Войцік (–100 кг); «срэбра» — Марына Слуцкая (+ 78 кг) і Артур Куцько (–66 кг); «бронзу» — Кацярына Мацулевіч (–48 кг), Таццяна Дземчанка (–57 кг), Юлія Цыбоўская (–70 кг), Дзяніс Муранькоў (–81 кг), Багдан Войцік (абсалютная вагавая катэгорыя).
Віншуем і ганарымся!
16 лістапада 2018 года, № 14 (1218)
ЛІДАР Нацыянальнай каманды Беларусі па дзюдо — студэнтка факультэта фізічнага выхавання БДПУ Марына Слуцкая перамагла на Гран-пры па дзюдо ў Абу-Дабі (ААЭ) у вагавай катэгорыі звыш 78 кг. У медалёвай калекцыі Марыны захоўваюцца ўзнагароды рознай вартасці. Яны здабыты на буйных міжнародных турнірах серыі Гран-пры і European Open. А днямі спартсменка прывезла «бронзу» з Гран-пры па дзюдо ў Ташкенце. Так трымаць!
НА ТЫДЗЕНЬ раней з бронзавым медалём чэмпіянату Еўропы па кікбоксінгу (г. Браціслава, Славакія) вярнуўся яшчэ адзін прадстаўнік нашага ўніверсітэта Мікіта Мірончык. Удалае выступленне забяспечыла студэнту факультэта фізічнага выхавання БДПУ ўдзел у Сусветных гульнях, якія адбудуцца ў 2019 г. у ЗША. Хварэем за нашых!
ЗБОРНАЯ БДПУ «Пед універсітэт» упэўнена перамагла сваіх саперніц з Рэспубліканскага дзяржаўнага вучылішча алімпійскага рэзерву ў матчы за Суперкубак Рэспублікі Беларусь па міні-футболе сярод жаночых каманд. Віншуем нашых спартсменак і іх трэнера С. А. Траско!
І ЯШЧЭ адзін медаль — на гэты раз сярэбраны — здабылі выхаванкі Сяргея Аркадзьевіча Траско. Гаворка ідзе пра спаборніцтвы ў рамках праграмы Рэспубліканскай універсіяды. Другі год запар футбалісткі БДПУ займаюць другую прыступку на п’едэстале гонару па выніках фінальнай сустрэчы з камандай БДУФК. Спадзяёмся, што ў наступным годзе святкаваць вікторыю будуць нашы дзяўчаты!
21 верасня 2018 года, № 11 (1215)
Вераснёўскія STARты
Узгадваю словы культавай песні Юрыя Шаўчука: «Што такое восень…» — гэта «вецер» і «неба пад нагамі». А для мяне восень — гэта залаты верасень, пачатак навучальнага года, час збору вялікай дружнай сям’і БДПУ, а яшчэ — дзень нараджэння роднага Мінска. Па добрай традыцыі танкаўцы актыўна ўключаюцца ў віхор мерапрыемстваў, прымеркаваных да Дня горада. І 951-я ўгодкі сталіцы — таму пацвярджэнне. Здавалася, у цэлым Мінску не прайшло ніводнай урачыстай акцыі, ніводнага спартыўнага свята, канцэрта ці выстаўкі, якія б не ўпрыгожылі сваімі талентамі зоркі БДПУ. Гэта і не дзіўна, бо да віншаванняў любімай сталіцы далучыліся больш за дзве з паловай тысячы танкаўцаў! А самым масавым удзелам БДПУ быў па традыцыі адзначаны Мінскі паўмарафон.
У нядзелю 9 верасня больш за 35 тысяч чалавек з 53 краін свету кінулі выклік розным па даўжыні бегавым дыстанцыям. І ў іх ліку — 1860 студэнтаў, выкладчыкаў і супрацоўнікаў БДПУ. Адзінай камандай выступілі калектывы інстытутаў і факультэтаў, службаў і падраздзяленняў, члены сем’яў супрацоўнікаў. Іх аб’ядноўвалі камандны дух, байцоўскі настрой, гонар за сваю alma mater, а таксама адзіная форма і карпаратыўная сімволіка. І, вядома, жаданне пабіць рэкорды мінулага года: да гэтага танкаўцаў стымуляваў універсітэцкі дэвіз «З БДПУ — да новых перамог!»
Урэшце, перанясемся на стартавую пляцоўку, дзе пачатку забегу чакаюць адны з самых актыўных удзельнікаў гэтага святочнага мерапрыемства — новыя зорачкі ў галактыцы БДПУ — першакурснікі. «Мы тут упершыню і такога эмацыйнага ўсплёску не адчувалі за ўвесь час, пакуль сядзелі за школьнымі партамі. І гэта пры тым, што забег яшчэ не пачынаўся. Што ж будзе на фінішы! Напэўна, атрымаўшы медалі, адчуем эйфарыю і паверым, што мы сапраўдныя героі», — весела каментуюць свае пачуцці прадстаўніцы фізіка-матэматычнага факультэта.
Хоць да пачатку забегу яшчэ далёка, аднак эмоцыі немагчыма суняць. Праўда, праз некаторы час і яны падаліся рэпетыцыяй, калі дружная каманда нашай alma mater прывітала з’яўленне рэктара БДПУ Аляксандра Іванавіча Жука. Напэўна, у той момант танкаўцаў пачуў увесь Мінск. «Гэта так прыемна, калі кіраўнік знаходзіцца ў гушчыні падзей, папросту кантактуе са студэнтамі, жадае лёгкага бегу і добрага настрою, калі з ім можна сфатаграфавацца і нават паціснуць руку», — дзеляцца ўражаннямі студэнты і выстройваюцца ў чаргу, каб зрабіць сэлфі з самым спартыўным рэктарам самага спартыўнага ўніверсітэта. Падчас кароткага інтэрв’ю Аляксандр Іванавіч адзначае: «Ужо чацвёрты год БДПУ прымае ўдзел у Мінскім паўмарафоне, бо на самай справе і сённяшнія, і будучыя педагогі — за спартыўны лад жыцця. І гэтыя словы я магу пацвердзіць лічбамі: звыш 1800 будучых пераможцаў сёння стартуюць на аднайменным праспекце сталіцы. Асабіста для мяне паўмарафон — гэта свята, якое я праводжу ў калектыве сваіх аднадумцаў — калег і студэнтаў БДПУ».
А дзначыць Дзень горада на 5-кіламетровай дыстанцыі прыйшлі і выкладчыкі нашага ўніверсітэта, якія ў гэты дзень пакінулі дома сваю прафесійную стрыманасць і сур’ёзнасць і па-студэнцку радаваліся святочнай атмасферы, магчымасці прадэманстраваць добрую фізічную форму. Так, дэкан факультэта дашкольнай адукацыі Вольга Мікалаеўна Анцыпіровіч адзначыла: «Я ўжо другі год запар прымаю ўдзел у паўмарафоне і вельмі рада, што стаўлю новыя рэкорды ў складзе дружнай каманды ФДА».
Сваімі думкамі з карэспандэнтам «Н» падзялілася намеснік дэкана філалагічнага факультэта па рабоце з замежнымі студэнтамі Людміла Аляксандраўна Бяссонава: «Людзей розных нацыянальнасцей у БДПУ аб’ядноўвае не толькі працэс навучання, а і агульныя справы. Мы прыйшлі на паўмарафон, каб бегчы разам, гэтаксама як разам здабываем веды. Каб праявіць вытрымку, без якой нельга абысціся падчас вучобы. Каб вытрываць фізічную нагрузку, як штодня пераадольваем напружанне інтэлектуальнае. І гэта нармальна. А яшчэ разам мы будзем захапляцца прыгажосцю нашага агульнага дома — Мінска».
Цэнтр бухгалтарскага ўліку і фінансавага забеспячэння сёлета прымаў удзел у Мінскім паўмарафоне ўпершыню. Аднак, нягледзячы на статус навічка, каманда на чале з кіраўніком падраздзялення Л. Л. Закрэўскай падышла да камплектавання звышсур’ёзна. Склад супрацоўнікаў ЦБУіФЗ быў «умацаваны » самымі спрытнымі членамі сем’яў. Сярод іх — пяцігадовая Дар’я, дачушка вядучага бухгалтара цэнтра Юліі Карповіч. І сям’я спецыяліста Алены Рулькевіч, якая выходзіць у поўным складзе, каб падтрымаць сваю маму. Уражанні членаў каманды самыя станоўчыя: «Мерапрыемства арганізавана ярка і аптымістычна! І хоць забег яшчэ наперадзе, мы ўпэўнены, што і ў наступным годзе таксама прымем удзел у масавым старце паўмарафону!»
Побач рыхтуюцца паставіць уласны рэкорд хуткасці прадстаўнікі бібліятэкі. «Наш калектыў — за здаровы лад жыцця: мы ўдзельнічаем у спартакіядзе сярод супрацоўнікаў БДПУ, плаваем, ходзім у трэнажорную залу ўніверсітэта (асабіста я атрымліваю велізарнае задавальненне ад яе наведвання і з нецярпеннем чакаю адкрыцця новага сезону). А вось у паўмарафоне ўдзельнічаю ўпершыню, — распавядае вядучы бібліятэкар Вольга Мікалаеўна Паўловіч. — Памятаючы захопленыя водгукі сваіх калег, таксама заразілася жаданнем прабегчы на спартыўным фэсце, чарговы раз адчуць сябе членам вялікай дружнай універсітэцкай сям’і і бліжэй пазнаёміць з ёю сваіх сыноў — 7-класніка Канстанціна і 10-класніка Арсенія. Яны спартыўныя хлопцы, і 5-кіламетровай дыстанцыяй іх не напалохаеш. Косця займаецца валейболам у СДЮШАР, Арсеній абраў каратэ, да таго ж усе мы — заўзятыя турысты. Сёлетні паўмарафон стане для маіх сыноў нагодай бліжэй пазнаёміцца з „мамчынай работай“. З сынамі і дочкамі пабягуць свой трэці паўмарафон яшчэ чатыры бібліятэчныя сям’і. Іх дзеці — учарашнія школьнікі — павырасталі, паступілі ў розныя ўстановы адукацыі, але дагэтуль працягваюць бегаць разам са сваімі бацькамі за БДПУ! Я ўпэўнена, што ў наступным годзе нас стане яшчэ больш. Спорт аб’ядноўвае. Любімы горад, любімы ўніверсітэт, любімая праца і любімая сям’я — вось што такое для мяне паўмарафон!»
Часу на размовы не застаецца: тры, два, адзін… старт! Бегуноў накрывае бліскучае воблака канфеці. Пачынаецца масавы забег. Удзельнікаў падбадзёрваюць шматлікія групы падтрымкі, слоганы на плакатах, рытмічная музыка… Чуем заклік «БДПУ! Наперад! » ад прарэктара па вучэбнай рабоце ўніверсітэта Валерыя Міхайлавіча Зелянкевіча і пачынаем працаваць нагамі і рукамі яшчэ актыўней. З часам стартавы натоўп удзельнікаў большменш раўнамерна размяркоўваецца па дыстанцыі. Кожны адолены кіламетр набліжае фініш…
Што адчувала менавіта я, калі ўжо няспешна ішла атрымліваць заслужаны медаль? Гонар. За сябе. За людзей, што навокал. За самы лепшы горад у свеце. За родны педагагічны ўніверсітэт. За «каманду мары», якая аб’яднала ў сваім складзе спартсменаў і аматараў — студэнтаў і выкладчыкаў alma mater. А паколькі на вялікія справы мяне натхняе яшчэ адзін слоган — «БДПУ: мы проста космас!», то і свае ўражанні ад удзелу ў 5-кіламетровым забегу параўноўваю з зорным шлейфам яркіх эмоцый, якія будуць узнімаць настрой на працягу ўсяго навучальнага года і аж да пятага, юбілейнага, паўмарафону.
Наталля ДАВЫДАВА
31 жніўня 2018 года, № 10 (1214)
ДЗЯВЯТАГА верасня танкаўцы на чале з рэктарам універсітэта А. І. Жуком у чацвёрты раз выйдуць на старт Мінскага паўмарафона. Дружная сям’я БДПУ — пераможца ў намінацыі «Самы масавы забег-2015» і па агульным прызнанні Dream team 2016 і 2017 гадоў — рыхтуецца да ўдзелу ў адной з самых маштабных спартыўных падзей краіны. Стаць членам каманды проста: трэба паведаміць пра сваё жаданне куратару акадэмічнай групы або работніку дэканата (намесніку дэкана па выхаваўчай рабоце) свайго факультэта/інстытута. І — да сустрэчы на старце!
ЧАЦВЁРТАКУРСНІЦА факультэта фізічнага выхавання БДПУ Марына Слуцкая заваявала сярэбраную ўзнагароду на Гран-пры па дзюдо ў Будапешце (Judo GrandPrix Budapest 2018) у вагавай катэгорыі звыш 78 кг. Віншуем лідара беларускай каманды і зычым дзяўчыне новых перамог!
СТУДЭНТ 2-га курса ФФВ Кірыл Маскевіч выйграў бронзавы медаль чэмпіянату Еўропы па грэка-рымскай барацьбе сярод юніёраў (вагавая катэгорыя 82 кг). Удзельнікаў Кантынентальнага першынства 30 ліпеня — 5 жніўня прымаў спартыўны комплекс Centro Olimpico — PalaPellicone ў Рыме (Італія). Ганарымся Кірылам і яго трэнерам — выкладчыкам кафедры спартыўнапедагагічных дысцыплін Элбекам Тажыевым!
31 мая 2018 года, № 8 (1212)
У ФІНАЛЕ Рэспубліканскай студэнцкай баскетбольнай лігі сярод жаночых каманд, як і летась, сустрэліся зборныя БДПУ (трэнер Т. В. Харашылава) і ГрДУ. Нягледзячы на якасна праведзеную гульню і праяўленую волю да перамогі, спартсменкам нашага ўніверсітэта не ўдалося паўтарыць мінулагодні поспех. У выніку – ганаровае 2-е месца. Узнагароджанне каманды-прызёра адбудзецца 31 мая ў рамках адкрыцця Рэспубліканскай універсіяды 2018 года.
З ЧЭМПІЯНАТУ Еўропы па самба, які праходзіў 17–21 мая ў сталіцы Грэцыі – Афінах, выпускнікі факультэта фізічнага выхавання БДПУ прывезлі тры ўзнагароды. Залаты медаль – Уладзіслаў Саяпін (вагавая катэгорыя 68 кг), сярэбраны – Крысціна Казаной (60 кг), бронзавы – Лейла Абасава (48 кг).
НА ПЕРШЫНСТВЕ Рэспублікі Беларусь па дзюдо студэнты факультэта фізічнага выхавання заваявалі 6 медалёў. Другое месца на п’едэстале гонару пакарылася Артуру Куцько і Аляксандру Сідорыку, трэцяе – першакурснікам Антону Сачыловічу і Настассі Прытычэнцы, а таксама другакурснікам Аляксандру Лычкоўскаму і Кацярыне Мацулевіч.
У ПРАГРАМУ ІІІ Еўрапейскіх універсітэцкіх гульняў, што пройдуць у ліпені ў партугальскай Каімбры, уключаны спаборніцтвы па 13 відах спорту. У двух з іх прымуць удзел спартсмены Рэспублікі Беларусь. У склад дэлегацыі па дзюдо ўключаны тры прадстаўнікі факультэта фізічнага выхавання БДПУ – студэнтка 2-га курса Марыя Кандрацьева, першакурснік Антон Сачыловіч, а таксама іх трэнер – выкладчык кафедры спартыўна-педагагічных дысцыплін А. У. Катлоўскі.
28 красавіка 2018 года, № 6 (1210)
СТУДЭНТ 4-га курса факультэта фізічнага выхавання Д. Макарэвіч (трэнеры А. М. Курда і А.А. Папроцкі) заваяваў золата чэмпіянату Рэспублікі Беларусь па боксе. Гэта спаборніцтва (1–14 красавіка) стала своеасаблівай падрыхтоўкай «боем» да ІІ Еўрапейскіх гульняў. Зычым Дзмітрыю і надалей упэўненых перамог!
ВІНШУЕМ зборную БДПУ па валейболе сярод жаночых каманд, якая здабыла срэбра Рэспубліканскай універсіяды–2018 у групе «А», і яе трэнера Я. А. Пімахіна. Варта адзначыць, што ў мінулым годзе нашы дзяўчаты былі толькі дзясятыя. Так трымаць!
«ЗОЛАТАМ» і «серабром» Рэспубліканскай універсіяды папоўнілі медалёвую скарбонку БДПУ дзявочая і юнацкая зборныя alma mater па самба. Сёлета спартсмены пад кіраўніцтвам сваіх трэнераў А. У. Катлоўскага і А. В. Хіжэўскага палепшылі вынікі: у мінулым годзе яны займалі трэцюю прыступку на п’едэстале гонару.
Віншуем!
30 сакавіка 2018 года, № 4 (1208)
ЗОЛАТА першынства Рэспублікі Беларусь па дзюдо сярод юніёраў заваявалі першакурснік факультэта фізічнага выхавання Антон Сачыловіч (вагавая катэгорыя да 90 кг) і студэнтка 2-га курса Кацярына Мацулевіч (да 44 кг). Бронзавыя медалі таксама дасталіся спартсменам БДПУ – Анастассі Прытытчанцы (да 48 кг), Аляксандру Сідорыку (да 90 кг) і Алегу Рудышыну (вагавая катэгорыя 100+). Віншуем дзюдаістаў і іх трэнераў А. У. Катлоўскага, А. А. Шлыка, С. А. Гуманава, В.В. Сумайловіч!
ЗАВЯРШЫЎСЯ міжрэгіянальны тур Рэспубліканскай студэнцкай баскетбольнай лігі-2018 сярод жаночых каманд. Зборная БДПУ перамагла ў дзвюх гульнях і ўпэўнена прайшла ў паўфінал.
НА БАЗЕ БДУФК прайшлі спаборніцтвы рэгіянальнага тура Рэспубліканскай студэнцкай гандбольнай лігі-2018 сярод мужчынскіх каманд. Упэўнена абыграўшы сваіх сапернікаў па групе, наша зборная перайшла ў наступную стадыю турніру.
ЖАНОЧАЯ зборная БДПУ па міні-футболе другі раз стала чэмпіёнам Рэспубліканскай універсіяды. Звання “Лепшы ігрок” турніра ўдастоена капітан каманды Таццяна Чысцік. Жадаем поспехаў дзяўчатам і іх трэнеру С.А. Траско!!
НА РЭСПУБЛІКАНСКАЙ універсіядзе па біятлоне ў Наваполацку зборная каманда нашага ўніверсітэта заняла 5-е агульнакаманднае месца
Прадстаўнікі БДПУ акунуліся ў атмасферу спартыўнага свята – наведалі спаборніцтвы IV чэмпіянату свету сярод студэнтаў па канькабежным спорце і адборачны матч чэмпіянату Еўропы па гандболе паміж жаночымі зборнымі камандамі Беларусі і Косава.
Іван МОРГУН, дырэктар СК «Педагог»
7 сакавіка 2018 года, № 3 (1207)
ДАСЯГНУТЫМ – ГАНАРЫМСЯ, ДА ЛЕПШАГА – ІМКНЁМСЯ!
БДПУ па выніках Універсіяды-2017, як і годам раней, заняў 4-е месца, прайграўшы ўсяго толькі 28 ачкоў камандзе БНТУ. Важна адзначыць, што гэта зусім невялікае адставанне ад 3-га месца, бо падлік сумарнай колькасці балаў вядзецца на ўзроўні тысяч. Таму ў бягучым, 2018-м, годзе перад спартсменамі-танкаўцамі стаіць сур’ёзная задача: узняцца на п’едэстал гонару Рэспубліканскай універсіяды!
Тым не менш, і сёння нам ёсць чым ганарыцца. Самая маладая зборная БДПУ «Педуніверсітэт» – жаночая каманда па міні-футболе – зрабіла неверагоднае: стала першай у першым чэмпіянаце Рэспублікі Беларусь! Трэба адзначыць, што спартсменкі ні разу не саступілі сваім саперніцам: з 16 паядынкаў яны перамаглі ў 14 і толькі 2 згулялі ўнічыю. Згодна са статыстыкай, у сярэднім дзяўчаты забівалі па 9,3 гола за адну гульню! Дзякуючы сваёй гістарычнай перамозе клуб БДПУ «Педуніверсітэт» пад кіраўніцтвам трэнера С. А. Траско атрымаў права ўдзельнічаць у Лізе чэмпіёнаў УЕФА нароўні з самымі моцнымі камандамі Еўропы.
У першы дзень вясны, 1 сакавіка, прайшло святочнае мерапрыемства ў гонар чэмпіёнаў. «Сапраўды, сёння для нас слова „першы“ – ключавое. Першы дзень вясны, першы чэмпіянат па міні-футболе і першы кубак у нашых руках! Дзяўчаты, вы ўзнялi імідж alma mater як спартыўнага ўніверсітэта. Дзякуй вам за гэта! Мы рады, што вы праявілі волю да перамогі, прадэманстравалі моцны камандны дух, зрабілі важны крок на шляху развіцця жаночага футболу ў БДПУ. І памятайце: для нас няма іншага месца, акрамя першага», – сказаў рэктар БДПУ А. І. Жук, звяртаючыся да пераможцаў.
Слова ўзяў і намеснік старшыні Беларускай федэрацыі футболу, старшыня Беларускай асацыяцыі міні-футболу С. М. Куніца: «Калі ў 2016 г. я ўзнагароджваў мужчынскую зборную БДПУ ў сувязі з перамогай у Рэспубліканскай студэнцкай футбольнай лізе, то сказаў, што наспеў час выставіць і жаночую каманду ўніверсітэта. Аляксандр Іванавіч Жук мне адказаў, што так яно і будзе. А ён – чалавек слова. І ўсе мы сталі сведкамі таго, як рэктар БДПУ стрымаў сваё абяцанне».
Тое, што чэмпіянат прайшоў на належным узроўні, адзначыў і генеральны сакратар Беларускай асацыяцыі міні-футболу У. М. Завадскі: «Каманда „Педуніверсітэт“ паказвала высокі ўзровень гульні з самага пачатку спаборніцтваў. Сёння мне прыемна паведаміць прысутным, што Нацыянальная зборная Рэспублікі Беларусь па міні-футболе сярод жанчын будзе сфарміравана на базе каманды БДПУ і пад кіраўніцтвам яе трэнера С. А. Траско».
Пасля віншавальных слоў Беларуская асацыяцыя па міні-футболе ўзнагародзіла спартсменак залатымі медалямі, падаравала набор мячоў і камплект спартыўнай формы, каб зборная не толькі паказвала высокія вынікі, але і выглядала на ўсе 100. Без падарункаў не засталіся і госці: яны атрымалі фірменную сувенірную прадукцыю з лагатыпам БДПУ.
Кульмінацыяй мерапрыемства стала цырымонія ўручэння кубкаў за званні «Лепшы варатар», «Лепшы абаронца» і «Лепшы футбаліст» чэмпіянату.
Са словам у адказ выступілі галоўны трэнер зборнай С. А. Траско і абаронца каманды Д. Матусевіч. Сяргей Аркадзьевіч падзякаваў за тое, што ў БДПУ была створана дзявочая футбольная каманда, а Дар’я заявіла: «У наступны раз мы зноў станем чэмпіёнкамі!»
Падчас музычнага віншавання разам з папулярнай групай «ByCity» песню «Команда молодости нашей» спявалі ўсе прысутныя, а віртуознае папуры ад удзельніка групы «Лепрыконсы» Уладзіміра Федарука і студэнта факультэта эстэтычнай адукацыі Мікіты Камянецкага прымусіла сэрцы біцца ва ўнісон. Перамога нашай жаночай зборнай па міні-футболе – сапраўды важная падзея, якой мы можам ганарыцца. Але гэта яшчэ не ўсе спартыўныя дасягненні будучых педагогаў.
Тое, што шлях да месца на п’едэстале доўгі і цярністы, зразумела кожнаму з нас. Аднак лепшым становіцца не той, хто баіцца не выйграць, а той, хто не баіцца прайграць.
Прыкладна гэтак разважалі гандбалісткі жаночай зборнай БДПУ падчас Рэспубліканскай універсіяды-2016, калі ім не хапіла самай драбніцы для залатога медаля. Але дзякуючы ўпартасці, настойлівасці і карпатлівым трэніроўкам нашы дзяўчаты ў 2017 г. нарэшце дасягнулі найвышэйшай ступенi: звання чэмпіёнак Універсіяды.
Гэтая падзея натхніла калектыў alma mater на п%