Свежы нумар
Пажаданні і заўвагі дасылайце на электронны адрас рэдакцыі: nastaunik@bspu.by
Чацвер, 16 сакавіка 2023 года № 3 (1289)
Афіцыйная хронікаДНЯМІ ў БДПУ адбылося пасяджэнне Грамадскага савета базавай арганізацыі дзяржаў – удзельніц СНД па падрыхтоўцы, перападрыхтоўцы і павышэнні кваліфікацыі педагагічных работнікаў і спецыялістаў у галіне інклюзіўнай і спецыяльнай адукацыі (далей – Грамадскі савет), прысвечанае падвядзенню вынікаў працы за мінулы год. Перад удзельнікамі сустрэчы – прадстаўнікамі 11 устаноў вышэйшай адукацыі краін СНД– выступіў старшыня Грамадскага савета прафесар А.І. Жук. Аляксандр Іванавіч абагульніў вынікі дзейнасці па асноўных напрамках: навуковай, навукова-практычнай і метадычнай рабоце; сеткавым узаемадзеянні і абмене вопытам у галіне інклюзіўнай і спецыяльнай адукацыі; развіцці інфармацыйных рэсурсаў. Сярод задач на бягучы год былі названы такія, як завяршэнне распрацоўкі мадэльнай канцэпцыі развіцця педагагічнай адукацыі ў кантэксце прынцыпу інклюзіі, стварэнне міжнароднага рэсурсу «Залатыя лекцыі» па праблемах развіцця і навучання дзяцей з асаблівымі адукацыйнымі патрэбамі і інш… |
Навіны БДПУАДБЫЛАСЯ сустрэча Кіраўніка Адміністрацыі Прэзідэнта Рэспублікі Беларусь І.П. Сергяенкі са студэнцкім актывам універсітэта. Мерапрыемства прайшло ў рамках інфармацыйна-асветніцкага праекта «ЗАліковая размова», які дае моладзі магчымасць пазнаёміцца з вядомымі ў краіне людзьмі і абмеркаваць з імі найбольш актуальныя пытанні. Ігар Пятровіч акрэсліў сітуацыю, якая склалася ў Рэспубліцы Беларусь і па-за яе межамі, праінфармаваў будучых настаўнікаў аб грамадскапалітычных працэсах і планах сацыяльна-эканамічнага развіцця нашай дзяржавы. Студэнты з першых хвілін праявілі зацікаўленасць. Захаванне гістарычнай памяці, падтрымка малых вёсак, роля сям’і і школы ў выхаванні дзяцей, інфармацыйная бяспека – гэта толькі некаторыя тэмы, якія былі абмеркаваны падчас сустрэчы. Дыялог атрымаўся па-сапраўднаму нязмушаным і канструктыўным.
Напрыканцы мерапрыемства І.П. Сергяенка адзначыў найбольш актыўных удзельнікаў размовы і ўручыў падарункі ад Адміністрацыі Прэзідэнта Рэспублікі Беларусь. Будучыя педагогі, у сваю чаргу, перадалі Ігару Пятровічу на памяць аб сустрэчы карціну, выкананую студэнтамі факультэта эстэтычнай адукацыі.
ПЯЦЬ лепшых студэнтаў фізіка-матэматычнага факультэта БДПУ атрымалі пасведчанні аб назначэнні стыпендый «Приорбанк» ААТ за дасягненні ў вучобе і навукова-даследчай рабоце. Гэта чацвёртакурснікі Настасся Шалесная, Вадзім Міналта, Ксенія Барысенка, Аляксандр Налівайка, а таксама трэцякурсніца Дар’я Паплёўка. Уручэнне правялі намеснік старшыні Праўлення Сяргей Іванавіч Шышоў і дырэктар дэпартамента па рабоце з персаналам Сяргей Аляксандравіч Савіцкі… |
Спартыўны навігатарСТУДЭНТЫ БДПУ сталі пераможцамі першынства Рэспублікі Беларусь сярод моладзі па дзюдо. Першае месца заваяваў трэцякурснік факультэта фізічнага выхавання Глеб Хаткоўскі, другое – першакурснік Сяргей Якубенка, трэцяе – Раман Манішка (3 курс) і Раман Броўка (1 курс). Віншуем трэнераў Д. Кунцэвіча, С. Карнейчыка, Ю. Смурговіча, А. Хіжэўскага і А. Катлоўскага з паспяховым выступленнем на спаборніцтвах іх выхаванцаў!
ДНЯМІ завяршыўся шосты па ліку чэмпіянат Рэспублікі Беларусь па міні-футболе сярод жаночых каманд. Сёлета ў ім прынялі ўдзел шэсць каманд, тры з якіх прадстаўлялі ўстановы вышэйшай адукацыі краіны (БДПУ, БДУ, ГрДУ). Перад заключным турам на 2-е і 3-е месцы на п’едэстале гонару прэтэндавалі тры зборныя. Каманда БДПУ «Педуніверсітэт» сур’ёзна настроілася на вырашальную гульню і з лікам 6:1 упэўнена абыграла зборную БДУ. Гэта перамога гарантавала нашым спартсменкам бронзавыя медалі. Заставалася толькі дачакацца заканчэння матча паміж камандамі «Славянка» і «Энергетык». Пры пэўным раскладзе ў нашых дзяўчат з’яўляўся шанец узняцца на другі радок турнірнай табліцы. На вялікі жаль, надзеі не спраўдзіліся і да срэбра не хапіла толькі аднаго бала…
З лепшых ігракоў турніру арганізатары склалі сімвалічную зборную. У яе склад увайшла студэнтка БДПУ Наталля Асмыковіч. Віншуем каманду БДПУ і яе трэнера Сяргея Аркадзьевіча Траско з паспяховым выступленнем і жадаем далейшых спартыўных дасягненняў! |
Жыццё БДПУАБ’ЯДНАНЫЯ МАГІЯЙ ЗОРНЫХ ВАНДРОВАК З году ў год атрады зорнікаў папаўняюцца новымі ўдзельнікамі, зачараванымі непаўторным духам традыцыйных вандровак, якія аб’ядноўваюць будучых педагогаў у іх імкненні захаваць гістарычную спадчыну, падзяліцца з гасціннымі жыхарамі розных раёнаў краіны творчымі набыткамі, адкрыць для сябе маленькія таямніцы нашай вялікай Радзімы. Чарговы, 58-ы па ліку, інтэрнацыянальны Зорны паход завяршыўся, аднак эмоцый і ўражанняў у вандроўнікаў засталося багата. Падзяліцца імі, а таксама падвесці вынікі мерапрыемства дапытлівыя і актыўныя танкаўцы змаглі падчас злёту зорнікаў. У актавай зале нашага ўніверсітэта сабраліся прадстаўнікі 10 зорных атрадаў. З прывітальным словам да прысутных звярнуўся рэктар БДПУ Аляксандр Іванавіч Жук. Ён падкрэсліў, што зорнікі – не проста здольныя і цікаўныя студэнты. Гэта сапраўды крэатыўныя асобы, якія ўмеюць захапіць, натхніць, матываваць.
У рамках злёту былі падведзены вынікі праведзенай работы і прайшла цырымонія ўзнагароджання. Граматай БДПУ за актыўны ўдзел у грамадскім жыцці ўніверсітэта, зорных паходах, а таксама за поспехі ў вучэбнай дзейнасці былі адзначаны студэнты, магістранты і аспіранты alma mater. Адна з іх – чацвёртакурсніца Інстытута інклюзіўнай адукацыі Ксенія Лашчэўская –падзялілася з карэспандэнтам «Н»: «Зорны паход у складзе зводнага ўніверсітэцкага атрада “Моладзь БДПУ” – гэта заўсёды шмат эмоцый! Вельмі ганаруся тым, што падчас вучобы стала часткай такой вялікай і слаўнай традыцыі. На жаль, я выпускніца і сёлета апошні раз далучылася да Зорнага паходу ў якасці студэнткі. Таму вельмі прыемнаі ганарова атрымаць узнагароду – Грамату БДПУ. І ўдвая больш прыемна, што ўручэнне праводзіў рэктар універсітэта. У гэты дзень на сцэне была адзначана дзейнасць не толькі студэнтаў, але і магістрантаў і аспірантаў, якія на працягу шэрагу гадоў прымалі ўдзел у зорных вандроўках. Гэта самыя актыўныя прадстаўнікі моладзі БДПУ. Яны натхнялі мяне і маіх сяброў на плённую працу на карысць універсітэта і краіны ў цэлым. Зорныя паходы – унікальны праект, які мае больш чым паўвекавую гісторыю і аналагаў якому няма! Праект, які не мае падвойных стандартаў ці перапісаных гісторый, праект, у якога ёсць рухаючая сіла – памяць і патрыятызм будучых педагогаў!».
Упершыню ў гісторыі са студэнтамі БДПУ ў Зорны паход накіраваліся курсанты Інстытута пагранічнай службы Рэспублікі Беларусь. Іх удзел ва ўніверсітэцкім праекце быў удастоены Падзякі рэктара БДПУ. Ад імя будучых пагранічнікаў выступіў намеснік начальніка факультэта падрыхтоўкі афіцэрскіх кадраў падпалкоўнік Руслан Аляксандравіч Палазок. Ён адзначыў, што паміж дзвюма ўстановамі адукацыі склалася плённае супрацоўніцтва, якое важна ўмацоўваць… |
Свeт без межаўДЫЯЛОГ НА ПЕРСПЕКТЫВУ У пачатку сакавіка ў Яраслаўскім дзяржаўным педагагічным універсітэце імя К.Д. Ушынскага (ЯДПУ) прайшоў маштабны Міжнародны форум «Еўразійскі адукацыйны дыялог». Ён сабраў больш за 800 удзельнікаў – педагогаў, вучоных і экспертаў з Арменіі, Беларусі, Кітая, Кыргызстана, Манголіі, Сербіі, Таджыкістана, Узбекістана, а таксама прадстаўнікоў 59 рэгіёнаў Расіі. БДПУ на форуме прадстаўляла прарэктар па навуковай рабоце А.В. Позняк.
Праграма візіту была вельмі насычанай. Аляксандра Валянцінаўна прыняла ўдзел у Праектнай сесіі для прарэктараў па вучэбнай і выхаваўчай рабоце і рэктараў педагагічных універсітэтаў Расійскай Федэрацыі; прадставіла вопыт працы ўстаноў адукацыі Рэспублікі Беларусь па арганізацыі дзейнасці педагагічных класаў; выступіла на пленарным пасяджэнні форуму з дакладам «Трансфармацыя педагагічнай адукацыі ў кантэксце сучасных адукацыйных тэндэнцый: вопыт Рэспублікі Беларусь». Па рэзультатах праведзеных у межах форуму сустрэч з прадстаўнікамі Міністэрства асветы Расійскай Федэрацыі, Расійскага таварыства «Веды», дэпартамента адукацыі Яраслаўскай вобласці, іншых арганізацый і ўстаноў вышэйшай адукацыі дасягнуты шэраг дамоўленасцей аб супрацоўніцтве калектываў БДПУ і педагагічных універсітэтаў Расіі ў адукацыйным, навуковым і сацыякультурным напрамках… |
Навуковая палітраПЕДАГАГІЧНЫЯ АСНОВЫ АДУКАЦЫЙНАЙ ІНКЛЮЗІІ У 2022–2025 гг. Міністэрствам адукацыі Рэспублікі Беларусь сумесна з Дзіцячым Фондам ААН (ЮНІСЕФ) пры фінансавай падтрымцы Урада Расійскай Федэрацыі рэалізуецца праект міжнароднай тэхнічнай дапамогі «Інклюзіўная адукацыя: спрыяльнае асяроддзе для рэалізацыі патэнцыялу кожнага дзіцяці». Адным з асноўных выканаўцаў гэтага праекта з’яўляецца БДПУ.
У 2022 г. у рамках рэалізацыі праграмы ў БДПУ распрацаваны праекты шэрагу дакументаў, у ліку якіх стратэгія мадэрнізацыі зместу падрыхтоўкі, павышэння кваліфікацыі і перападрыхтоўкі педагагічных работнікаў у кантэксце рэалізацыі прынцыпу інклюзіі ў адукацыі; канцэпцыя зместу падрыхтоўкі настаўнікаў-дэфектолагаў да працы з навучэнцамі з асаблівымі адукацыйнымі патрэбамі; стратэгія падрыхтоўкі педагагічных работнікаў рэспубліканскіх цэнтраў інклюзіўнай адукацыі (РЦІА), уключаючы базавую падрыхтоўку і павышэнне кваліфікацыі, сістэму ўзаемнага калегіяльнага навучання і абмену вопытам на міжнародным узроўні. У лютым бягучага года ў Інстытуце інклюзіўнай адукацыі БДПУ адбылося пасяджэнне круглага стала па абмеркаванні стратэгіі мадэрнізацыі зместу падрыхтоўкі, павышэння кваліфікацыі і перападрыхтоўкі педагагічных работнікаў у кантэксце рэалізацыі прынцыпу інклюзіі ў адукацыі. У яго рабоце прынялі ўдзел больш за 60 чалавек. Удзельнікамі круглага стала сталі прадстаўнікі Міністэрства адукацыі, Дзіцячага Фонду ААН (ЮНІСЕФ), члены Каардынацыйнага савета праекта міжнароднай тэхнічнай дапамогі «Інклюзіўная адукацыя: спрыяльнае асяроддзе для рэалізацыі патэнцыялу кожнага дзіцяці». Далучыліся да іх прадстаўнікі ўніверсітэтаў, якія ажыццяўляюць падрыхтоўку педагагічных работнікаў; устаноў дадатковай адукацыі дарослых, што забяспечваюць павышэнне кваліфікацыі і перападрыхтоўку педагагічных работнікаў; устаноў дашкольнай і агульнай сярэдняй адукацыі; грамадскіх аб’яднанняў і арганізацый і інш… |
Ліст у нумарУ першыя дні сакавіка дэлегацыя БДПУ пад кіраўніцтвам першага прарэктара ўніверсітэта С.І. Копцевай прымала ўдзел у Рэспубліканскім свяце «Наваполацк – маладзёжная сталіца Рэспублікі Беларусь2023». З усёй краіны ў горад, што размясціўся на левым беразе Заходняй Дзвіны, прыехала шмат гасцей. Сярод іх маладыя вучоныя, старшыні студэнцкіх саветаў і прафкамаў, актывісты ГА «БРСМ». На працягу трох дзён прадстаўнікі БДПУ працавалі на розных пляцоўках і, вярнуўшыся, падзяліліся з чытачамі «Н» сваімі ўражаннямі.
НАТХНЯЦЦА ЭНЕРГІЯЙ МАЛАДОСЦІ Ульяна Мілашэўская, гістарычны факультэт:
– Маладыя людзі з розных раёнаў краіны ўдзельнічалі ў мерапрыемствах менавіта той арганізацыі, якую яны прадстаўлялі. Кожная з пляцовак мела пэўную праграму, якая ўключала круглыя сталы, семінары і майстар-класы. Напрыклад, для прафсаюзных лідараў была праведзена ўнікальная экскурсія на ААТ «Нафтан», дзе адбылася сустрэча са старшынёй прафкама Белхімпрафсаюза Уладзімірам Азаронкам. Нельга пакінуць без увагі насычаную культурную праграму – квэсты, прагляд спектакля. Яркім момантам свята стаў маладзёжны флэшмоб «Год міру і стварэння», які на доўгі час застанецца ў памяці кожнага з яго ўдзельнікаў. Кацярына Андрыевіч, факультэт пачатковай адукацыі: – Днямі вярнулася з Наваполацка, дзе была ўдзельніцай Рэспубліканскага свята. Арганізатары падрыхтавалі для гасцей цікавую і насычаную праграму. Пасля знаёмства з Полацкім дзяржаўным універсітэтам імя Ефрасінні Полацкай мы перамясціліся на пляцоўку для правядзення форуму «Беларусь. Моладзь. Стварэнне». Асабіста мяне ўразіў узровень мерапрыемства. Прэзентаваліся не толькі ідэі, але і шляхі іх рэалізацыі. Пагадзіцеся, гэта вельмі важна. Другі дзень пачаўся з урачыстага мітынгу і ўскладання кветак да мемарыяльнага комплексу «Зорка», устаноўленага на месцы былога лагера для ваеннапалонных. У ім прымалі ўдзел старшыня Віцебскага абласнога выканкама А.М. Субоцін, іншыя ганаровыя госці. Затым нас чакаў Палац культуры нафтавікоў, дзе праходзіла выстаўка-прэзентацыя «Наваполацк – горад магчымасцей для моладзі». На ёй быў прадстаўлены багаты патэнцыял аднаго з самых маладых гарадоў Беларусі. Далей – урачыстае адкрыццё свята, правядзенне дыялогавай пляцоўкі з удзелам старшыні Савета Рэспублікі Нацыянальнага сходу Рэспублікі Беларусь Н.І. Качанавай, Міністра адукацыі Рэспублікі Беларусь А.І. Іванца, прадстаўнікоў маладзёжных грамадскіх аб’яднанняў і фарміраванняў, а таксама тэматычныя мерапрыемствы Рэспубліканскага форуму «Беларусь. Моладзь. Стварэнне» з удзелам паслоў МУР і старшыняў маладзёжных парламентаў… |
Тэатральная тусоўкаЯШЧЭ АДЗІН КРОК ДА МАСТАЦТВА Напрыканцы лютага ў рамках рэалізацыі культурна-адукацыйнага праекта БДПУ «Праз мастацтва – да культуры будучых педагогаў» заключаны чарговы дагавор аб супрацоўніцтве. Гэтым разам з Заслужаным калектывам Рэспублікі Беларусь – «Тэатрам-студыяй кінаакцёра Нацыянальнай кінастудыі “Беларусьфільм”». Названая ўстанова культуры стала шостым партнёрам нашага ўніверсітэта ў справе выхавання студэнтаў alma mater сродкамі мастацтва. Свае подпісы пад дакументам паставілі першы прарэктар БДПУ С.І. Копцева і дырэктар тэатра А.В. Сцебакова.
Святлана Іванаўна, каментуючы падзею, падкрэсліла, што з пачатку бягучага навучальнага года БДПУ наладзіў супрацоўніцтва з Рэспубліканскім тэатрам беларускай драматургіі, Вялікім тэатрам Беларусі, Нацыянальным акадэмічным тэатрам імя Янкі Купалы, Беларускім дзяржаўным акадэмічным тэатрам юнага гледача, Мінскім абласным драматычным тэатрам. Такім чынам універсітэт садзейнічае развіццю асобы будучага педагога, пашырэнню яго кругагляду, знаёмству з культурнымі здабыткамі беларускага народа.
Дырэктар тэатра Ала Валер’еўна распавяла: «Тэатр – гэта тое, што можа змяніць наш свет, зрабіць яго лепшым. Мы вельмі рады, бо сёння да нас прыйшло шмат новых гледачоў. Студэнтам, выкладчыкам і супрацоўнікам БДПУ мы прапануем паглядзець візітоўку калектыву – камедыю А. Астроўскага “Ваўкі і авечкі”»… |
Формула поспеху8 Сакавіка – Дзень жанчын ЗАХАПЛЯЦЦА ПРЫГОЖЫМ – І СТВАРАЦЬ ПРЫГАЖОСЦЬ Жаночае хараство – паняцце вельмі шматграннае. Гэта і непаўторны стыль, і ўнутраная абаяльнасць, і творчая харызматычнасць… А яшчэ – уменне захапляцца прыгожым і перадаваць гэтае захапленне іншым. Супрацоўніцам БДПУ і прадстаўніцам чароўнай паловы прафесарска-выкладчыцкага складу не бракуе ніводнага з названых складнікаў. Гераіні гэтай падборкі, прымеркаванай да Дня жанчын, – асобы неардынарныя і творчыя, з адметным пачуццём прыгожага. Сёння яны распавядаюць чытачам «Н» пра свае хобі, якія непарыўна звязаны з прафесійнай дзейнасцю і спрыяюць эстэтычнаму выхаванню будучых педагогаў. Ганна ЖЫТКО, памочнік рэжысёра народнага студэнцкага тэатра «Мы», педагог дадатковай адукацыі цэнтра студэнцкай творчасці:
– Маё захапленне тэатрам пачалося яшчэ да школы, калі мама ўпершыню прывяла нас з братам на балет «Чыпаліна». І гэта было казачна! З таго часу мы перагледзелі ўвесь балетны рэпертуар нашага Вялікага тэатра і яго дзверы для мяне ўжо ніколі не зачыняліся. Пасля школы паступіла ў Беларускі дзяржаўны ўніверсітэт культуры і мастацтваў на спецыяльнасць «Мастацтвазнаўства», дзе адным з профільных прадметаў было тэатральнае мастацтва. Я наведвала пастаноўкі сталічных драматычных тэатраў і пісала рэцэнзіі на спектаклі. У 2002 г. заснавальнік студэнцкага тэатра «Мы» І.В. Карпенка запрасіў мяне ў БДПУ працаваць памочнікам рэжысёра і харэографам. Так тэорыя тэатральнай дзейнасці сумясцілася з практыкай. Я ўдзельнічала ў стварэнні спектакляў, назірала за гэтым працэсам знутры і ўсё больш і больш уцягвалася ў тэатральную кухню. А з цягам часу асвоіла і акцёрскае майстэрства: зараз іграю ў пастаноўках «Блондзі», «Канфуз», «Оскар і Ружовая Дама», «Каралева прыгажосці»… |
Ведай нашых!НЕ ПРОСТА КОНКУРС, А КАРЫСНЫ ВОПЫТ Імёны студэнтак і выпускніц БДПУ нярэдка з’яўляюцца ў СМІ з нагоды паспяховага ўдзелу нашых дзяўчат у разнастайных конкурсах прыгажосці. Не дзіва, што вызначаць уладальніцу тытула «Міс БДПУ» штогод так складана: кожная ўдзельніца гэтага спаборніцтва можа скласці годную канкурэнцыю ў барацьбе за тытул у падобных конкурсах па-за межамі ўніверсітэта. Чарговы доказ гэтаму – гісторыя Лізаветы КАНАПЕЛЬКА, другакурсніцы Інстытута псіхалогіі, якая рыхтуецца прадставіць alma mater у фінале конкурсу «Міс Мінск». Слова прыгажуні! – Барацьба за званне «Міс БДПУ» ў мінулым годзе не скончылася для мяне перамогай – я атрымала тытул «Міс талент». Аднак менавіта гэты творчы вопыт, першы ў маім жыцці, надаў упэўненасці ў сваіх сілах і падштурхнуў падаць заяўку на ўдзел у сталічным конкурсе «Міс Мінск». Інфармацыю пра кастынг я ўбачыла на старонцы нашага ўніверсітэта ў «Інстаграм». Параіўшыся з сябрамі, адкінула сумненні і адгукнулася на цікавую прапанову. Прайсці этапы адбору і аказацца ў ліку фіналістак было няпроста: высокая канкурэнцыя сярод прыгожых і разумных дзяўчат, вострыя пытанні журы, дэманстрацыя знешніх даных, мадэльных навыкаў, інтэлектуальных і творчых здольнасцей… Да ўсяго трэба было праявіць яшчэ і цярпенне: падчас вызначэння парадку выступленняў мне трапіўся перадапошні нумар. Зрэшты, выпрабаванне чаканнем прайшлі ўсе 22 фіналісткі: канчатковыя вынікі адбору сталі вядомыя праз два тыдні. Атрымаўшы радасную навіну, я ўключылася ў актыўную падрыхтоўку да заключнага этапу. Бясспрэчным плюсам конкурсу «Міс Мінск» мне бачыцца насычаная праграма, падрыхтаваная арганізатарамі. Наш графік прадугледжвае не толькі рэпетыцыі і профільныя заняткі, якія папярэднічаюць выступленню на сцэне. Значны час адведзены на агульнае развіццё канкурсантак, далучэнне да важных грамадскіх і сацыяльных ініцыятыў. Такім чынам, я стаўлюся да ўдзелу ў гэтым спаборніцтве не проста як да стандартнага конкурсу прыгажосці, а як да кропкі росту, да цікавай магчымасці даведацца нешта новае, праявіць сябе не толькі на подыуме… |
Мой факультэт/інстытутЗВІНІЦЬ, ЯК РУЧАЙ, НАША РОДНАЕ СЛОВА Міжнародны дзень роднай мовы – свята, якое аб’ядноўвае людзей з усіх краін і кантынентаў. Кожны чалавек, незалежна ад месца нараджэння і пражывання, мае найважнейшы духоўны скарб – мову. Студэнты і выкладчыкі філалагічнага факультэта 21 лютага далучыліся да святкавання, арганізаваўшы шэраг адмысловых мерапрыемстваў. Асноўнай падзеяй стала напісанне дыктоўкі «Роднае слова», якую правяла дацэнт кафедры мовазнаўства і лінгвадыдактыкі Таццяна Яўгенаўна Старасценка. Да філфакаўцаў пры дапамозе платформы Zoom змаглі далучыцца прадстаўнікі ўсіх інстытутаў і факультэтаў БДПУ. Таксама былі арганізаваны тэматычныя адукацыйныя і выхаваўчыя мерапрыемствы. Так, студэнты 4-га курса пад кіраўніцтвам прафесара кафедры мовазнаўства і лінгвадыдактыкі Наталлі Уладзіміраўны Чайкі сабраліся на круглым стале «Беларускія, кітайскія і туркменскія лінгвакультурныя паралелі: гісторыя і сучасны стан». Ад беларусаў з навуковымі паведамленнямі выступілі магістранты Аляксандр Чартко і Ульяна Ралько. «Я прадставіла даклад пра беларускае вяселле. Пасля замежныя студэнты распавялі пра вясельную абраднасць у іх краінах, падтрымліваючы свае аповеды яскравымі прыкладамі і мультымедыя. Разам мы заглыбіліся ў культуру кожнага на рода (беларускага, кітайскага і туркменскага), знайшлі як адрозненні ў традыцыях падрыхтоўкі і правядзення вяселля, так і супадзенні», – падзялілася ўражаннямі Ульяна. Першакурснікі праверылі атрыманыя ў школе веды па беларускай літаратуры, адказаўшы на пытанні займальнай віктарыны. Для даўніх сяброў філфака з сацыяльна-працоўных майстэрняў Беларускай асацыяцыі дапамогі дзецям-інвалідам і маладым інвалідам Кастрычніцкага раёна г. Мінска валанцёры клуба «Вандроўнікі з Альбарутэніі» арганізавалі свята «Дзень роднай мовы разам з БДПУ»… |
Аддзел кадраўУстанова адукацыі «Беларускі дзяржаўны педагагічны ўніверсітэт імя Максіма Танка» загадчыка кафедры замежных моў (тэрмінам на 5 гадоў, месца правядзення – філалагічны факультэт). Кваліфікацыйныя патрабаванні: вышэйшая адукацыя; навуковая ступень доктара ці кандыдата навук; наяўнасць навуковых прац або вынаходніцтваў, патэнтаў; стаж працы на пасадах педагагічных, навуковых работнікаў, пасадах кіраўнікоў ці спецыялістаў, дзейнасць якіх адпавядае напрамку адукацыі кафедры, не меншы за 7 гадоў; дацэнтаў кафедраў педагогікі (тэрмінам на 5 гадоў, месца правядзення – факультэт сацыяльна-педагагічных тэхналогій), фізікі і методыкі выкладання фізікі (тэрмінам на 5 гадоў, месца правядзення – фізіка-матэматычны факультэт), псіхалогіі адукацыі і развіцця асобы (тэрмінам на 4 гады, месца правядзення – Інстытут псіхалогіі). Кваліфікацыйныя патрабаванні: вышэйшая адукацыя; навуковая ступень доктара ці кандыдата навук; наяўнасць навуковых прац або вынаходніцтваў, патэнтаў; стаж працы на пасадах педагагічных, навуковых работнікаў, пасадах кіраўнікоў ці спецыялістаў, дзейнасць якіх адпавядае напрамку адукацыі кафедры, не меншы за 5 гадоў; выкладчыка кафедры музычна-педагагічнай адукацыі (месца правядзення – факультэт эстэтычнай адукацыі). Кваліфікацыйныя патрабаванні: вышэйшая адукацыя і наяўнасць ступені магістра (вышэйшая адукацыя і наяўнасць навуковай кваліфікацыі «Даследчык» або вышэйшая адукацыя і наяўнасць навуковай ступені); стаж працы на пасадах педагагічных, навуковых работнікаў не меншы за 1 год… Тэрмін падачы дакументаў – 1 месяц з дня апублікавання аб’явы. |
