Свежы нумар
Пажаданні і заўвагі дасылайце на электронны адрас рэдакцыі: nastaunik@bspu.by
Чацвер, 25 чэрвеня 2026 года № 6 (1335)
Свeт без межаў
У пачатку чэрвеня БДПУ гасцінна прымаў намесніка Міністра навукі і адукацыі Азербайджанскай Рэспублікі Фірудзіна Гурбанава. У Цэнтры азербайджанскай мовы і культуры нашага ўніверсітэта для высокага госця была арганізавана сустрэча з суайчыннікамі – студэнтамі-азербайджанцамі, якія навучаюцца ва ўстановах вышэйшай адукацыі г. Мінска. Удзел у размове прынялі Першы намеснік Міністра адукацыі Рэспублікі Беларусь Аляксандр Генадзьевіч Бахановіч, рэктар БДПУ Аляксандр Іванавіч Жук, прадстаўнікі Пасольства Азербайджанскай Рэспублікі ў Рэспубліцы Беларусь і Міністэрства адукацыі нашай краіны.
Звяртаючыся да моладзі, Фірудзін Гурбанаў заклікаў студэнтаў дастойна прадстаўляць Азербайджан у Беларусі. Ён падкрэсліў, што атрыманне якаснай адукацыі ў нашай краіне – найважнейшая інвестыцыя ў іх будучыню.
Свeт без межаў
КУРС НА ІНАВАЦЫІ
У Мінску 16 чэрвеня пад старшынствам Міністра адукацыі Беларусі Андрэя Іванавіча Іванца прайшла дзясятая Нарада міністраў адукацыі дзяржаў – членаў Шанхайскай арганізацыі супрацоўніцтва (ШАС). Прывітанне ўдзельнікам мерапрыемства накіраваў Прэзідэнт Рэспублікі Беларусь Аляксандр Рыгоравіч Лукашэнка.
Адкрываючы нараду, А.І. Іванец адзначыў: «Мы жывём у эпоху імклівых змен. Штучны інтэлект, лічбавая трансфармацыя, развіццё высокіх тэхналогій, кібербяспека, змены ў сусветнай эканоміцы прад’яўляюць прынцыпова новыя патрабаванні да падрыхтоўкі кадраў». Таму ў вядучых універсітэтах Беларусі ў супрацоўніцтве з установамі вышэйшай адукацыі Кітая, Расіі і іншых краін адкрываюцца эксперыментальныя праграмы падрыхтоўкі спецыялістаў новага пакалення. Гэта дазволіць рыхтаваць прафесіяналаў заўтрашняга дня, а таксама навуковыя кадры з адпаведнымі прыкладнымі навыкамі і кампетэнцыямі.
Віншуем!
НАВУКОВЫ ПАТЭНЦЫЯЛ КРАІНЫ
Сёлета ў ХХХІІ Рэспубліканскім конкурсе навуковых прац прынялі ўдзел студэнты і выпускнікі 53 устаноў вышэйшай адукацыі краіны (уключаючы іх філіялы). На другі этап конкурсу яны прадставілі больш за 2,9 тыс. даследаванняў. Аднак звання лаўрэата ўдастоіліся аўтары 72 работ. Чацвёра з іх – прадстаўнікі БДПУ.
Урачыстую цырымонію ўзнагароджання лаўрэатаў адкрыў Першы намеснік Міністра адукацыі Рэспублікі Беларусь А.Г. Бахановіч, які падкрэсліў важнасць навукова-даследчай дзейнасці не толькі для ўстаноў вышэйшай адукацыі, але і ў цэлым для развіцця дзяржавы.
Падзеі. Акцыі. Мерапрыемствы
«ВУЧЫСЯ І ПРАЦУЙ»
Вынесеныя ў загаловак гэтага матэрыялу словы далі назву праекту, які стартаваў у пачатку чэрвеня ва ўсіх універсітэтах Беларусі. Дзякуючы яму студэнты могуць уладкавацца на працу па спецыяльнасці яшчэ да атрымання дыплома аб вышэйшай адукацыі. БДПУ аказаўся ў ліку першых, хто прыступіў да рэалізацыі карыснай ініцыятывы: 8 чэрвеня ў сценах alma mater прайшоў міні-кірмаш вакансій. І гэта зусім заканамерна: дзякуючы арганізацыі практыкаарыентаванага навучання танкаўцы гатовы спрабаваць сябе ў прафесіі ўжо на другім курсе. Набыццё дадатковага педагагічнага вопыту і фінансавая незалежнасць – вось такія бонусы атрымліваюць у выніку нашы студэнты. Праект відавочна зацікавіў будучых педагогаў: да мерапрыемства, арганізаванага камітэтам па працы, занятасці і сацыяльнай абароне Мінгарвыканкама сумесна з аддзелам па ідэалагічнай і выхаваўчай рабоце БДПУ, далучылася больш за 400 чалавек.
Шэраг арганізацый г. Мінска, у тым ліку ўпраўленні па адукацыі адміністрацый раёнаў сталіцы, гімназіі, агульнаадукацыйныя школы, дзіцячыя садкі, прапанавалі суіскальнікам больш за 500 вакансій – педагога-псіхолага, сацыяльнага педагога, педагога-арганізатара, настаўніка фізікі, дэфектолага, музычнага кіраўніка, выхавальніка дашкольнай установы ці групы падоўжанага дня, памочніка выхавацеля і інш. Падчас мерапрыемства студэнты маглі даведацца пра ўмовы працы на гэтых пасадах, пракансультавацца ў прадстаўнікоў кадравых службаў устаноў і арганізацый, прайсці папярэдняе сумоўе.
Афіцыйная хроніка
ЧАРГОВАЕ ПАСЯДЖЭННЕ САВЕТА БДПУ БЫЛО ПРЫСВЕЧАНА ТЭМЕ ЎДАСКАНАЛЕННЯ ПРАЦЫ ПА ПРАФІЛАКТЫЦЫ СУПРАЦЬПРАЎНЫХ ПАВОДЗІН У МАЛАДЗЁЖНЫМ АСЯРОДДЗІ
Старшыня Савета – рэктар універсітэта А.І.Жук адзначыў, што прававое выхаванне – адзін з важных напрамкаў дзяржаўнай маладзёжнай палітыкі Рэспублікі Беларусь. Асаблівае значэнне гэтая праца набывае ў нашым універсітэце, паколькі будучыя педагогі павінны не проста валодаць высокім узроўнем прававой культуры, але і ў далейшым удзельнічаць у фарміраванні адказных грамадзянскіх паводзін у маладога пакалення.
З дакладам выступіла першы прарэктар БДПУ С.І.Копцева. Яна падкрэсліла, што работа па прававым выхаванні і прафілактыцы супрацьпраўных паводзін навучэнцаў ва ўніверсітэце носіць сістэмны характар.
Сёння ў БДПУ налічваецца 5360 навучэнцаў. Пільная ўвага надаецца непаўналетнім, іншагароднім і замежным студэнтам, дзецям-сіротам і тым, хто застаўся без апекі бацькоў, асобам з інваліднасцю, а таксама іншым катэгорыям моладзі, якія маюць патрэбу ў падтрымцы і суправаджэнні.
Ліст у нумар
МЫ ВАМ УДЗЯЧНЫЯ ЗА ЎСЁ…
Зусім хутка скончацца дзяржаўныя экзамены, і сотні новаспечаных уладальнікаў дыплома БДПУ раз’едуцца па ўсёй краіне, каб неўзабаве прыступіць да самастойнай прафесійнай дзейнасці. Перад гэтым напэўна будуць гучаць словы шчырай удзячнасці, абяцанні не губляцца і падтрымліваць зносіны, прызнанні ў любові alma mater… На жаль, мы не можам даць слова кожнаму выпускніку. Аднак маем магчымасць падзяліцца з вамі кранальным лістом, які прыйшоў на імя кіраўніцтва ўніверсітэта ад мамы аднаго з іх.
Студэнцкае жыццё майго сына Ільі Жукоўскага пачалося з факультэта сацыяльна-педагагічных тэхналогій БДПУ і з паважаных людзей, якія там працуюць. Яны безагаворачна прынялі Ілью ў дружную сям’ю ФСПТ, нягледзячы на асаблівасці здароўя, якія ў яго існуюць. Дзякуючы педагогам сённяшнім і будучым гады студэнцтва сталі аднымі з самых шчаслівых перыядаў жыцця майго сына. Дэвіз факультэта «Спяшайцеся рабіць дабро!» спраўдзіўся на сто працэнтаў!
Ведай нашых!
У рамках Рэспубліканскай спартакіяды работнікаў адукацыі і навукі, прысвечанай 105-годдзю галіновага прафсаюза, старшыня пярвічнай прафсаюзнай арганізацыі работнікаў БДПУ Вольга Мікалаеўна Паўловіч узнагароджана кубкам і дыпломам за 3-е месца ў Рэспубліканскім аглядзе-конкурсе на лепшую пастаноўку спартыўна-масавай і фізкультурна-аздараўленчай работы ў 2025 г.
Асноўнымі крытэрыямі ацэнкі дзейнасці арганізацыйных структур прафсаюза ў гэтым напрамку з’яўляліся колькасць спартыўна-масавых мерапрыемстваў, накіраваных на захаванне і ўмацаванне здароўя супрацоўнікаў, памер грашовых сродкаў, затрачаных на арганізацыю фізкультурна-аздараўленчай работы, удзел у рэспубліканскіх і міжнародных спаборніцтвах, а таксама колькасць публікацый у СМІ.
ЦРПА паведамляе
ЗОНА ПРОФІЛЬНАЙ ПАДТРЫМКІ ДЛЯ АБІТУРЫЕНТАЎ
У БДПУ ў перыяд прыёмнай кампаніі-2026 падчас мэтавага (з 27 чэрвеня па 2 ліпеня) і агульнага (з 12 па 14 ліпеня) набору будзе працаваць пляцоўка адмысловай падтрымкі для абітурыентаў з ліку выпускнікоў профільных класаў педагагічнай накіраванасці. Яе арганізатарам па традыцыі выступіць студэнцкі клуб выпускнікоў педагагічных класаў «ПРОФіль+».
Праект «Зона ПРОФільнай падтрымкі», які рэалізуецца ў БДПУ на працягу пяці гадоў, ужо стаў брэндам нашага ўніверсітэта. На пляцоўцы абітурыентаў сустракаюць профільцы – выпускнікі педагагічных класаў, якія прайшлі шлях ад школьнікаў да студэнтаў і гатовыя падзяліцца сваім вопытам. Іх галоўная задача – падтрымаць патэнцыйных танкаўцаў перад праходжаннем сумоўя, пракансультаваць па арганізацыйных пытаннях, дапамагчы з навігацыяй па ўніверсітэце.
Нам крылы даў БДПУ
ТРЫУМФАЛЬНЫ ЗАКЛЮЧНЫ АКОРД СТУДЭНЦТВА
Напрыканцы мая ў БДПУ прайшла ўрачыстая цырымонія ўзнагароджання пераможцаў і прызёраў конкурсу «Студэнт года». На ёй былі абвешчаны імёны лепшых танкаўцаў у шасці намінацыях: «Вучэбна-прафесійная дзейнасць», «Навукова-даследчая дзейнасць», «Маладзёжнае лідарства», «Валанцёрская дзейнасць», «Мастацка-творчая дзейнасць» і «Спартыўна-аздараўленчая дзейнасць». У ліку трыумфатараў і лаўрэатаў ІІ і ІІІ ступеняў сёлета апынулася пяцёра студэнтаў чацвёртага курса, якія ў хуткім часе разам з дыпломамі атрымаюць статус выпускнікоў, а затым і маладых спецыялістаў. Для іх паспяховы ўдзел у конкурсным спаборніцтве стаў не проста вынікам прадуктыўнага навучальнага года, а завяршальным пераможным акордам, развітальным салютам на фінішы студэнцкага жыцця. З якімі думкамі наша мэтанакіраваная, энергічная моладзь азіраецца на пройдзены шлях, чым ганарыцца, аб чым успамінае, што раіць маладой змене – даведаліся з першых вуснаў.
Сафія Смолікава, пераможца ў намінацыі «Маладзёжнае лідарства»:
– Назваць адну яркую старонку з маёй студэнцкай кнігі – усё роўна што выбраць адну зорку ўначы: кожная свеціць па-свойму, і ўсе разам яны ствараюць бясконца прыгожы ззяючы небасхіл. Мая гісторыя ў БДПУ атрымалася яскравай і насычанай. Кожны год, кожны праект, кожны крок у ёй былі па-свойму важнымі, і ўсе яны прывялі мяне да ключавога моманту – перамогі ў конкурсе «Студэнт года».
Спецыяліст гартуецца на практыцы
ПЕДАГАГІЧНАЕ ЛЕТА–2026: ПАШЫРАЕМ ПРАФЕСІЙНЫЯ ГАРЫЗОНТЫ
Свой бясспрэчны флагманскі статус сярод устаноў вышэйшай адукацыі педагагічнага профілю БДПУ падтрымлівае, сярод іншага, і шырокім студатрадаўскім рухам. Актывізуецца ён у самую цёплую пару года, калі ў школьнікаў пачынаюцца канікулы. Для будучых педагогаў гэта перыяд, калі яны ў складзе студатрадаў набываюць бясцэнны прафесійны вопыт, вучацца зладжанай каманднай дзейнасці, праяўляюць свае творчыя, арганізацыйныя, лідарскія здольнасці. Трэці працоўны семестр–2026 толькі пачаўся, але ўжо абяцае быць плённым, карысным і багатым на ўражанні. Такую выснову можна зрабіць на падставе водгукаў байцоў, камандзіраў і іх кіраўнікоў.
Ангеліна Валодчанка, Дар’я Балыкіна, байцы СПА «Данка-1» імя Героя Савецкага Саюза С.І. Грыцаўца факультэта пачатковай адукацыі:
– Лета – гэта час адкрыццяў, прыгод і новых магчымасцей. А для нас, будучых педагогаў, – час сапраўднага прызвання. Сёлета атрад «Данка-1» зноў у справе! Хто мы такія? Згуртаваная каманда маладых энергічных важатых, якія праходзяць сур’ёзную падрыхтоўку, каб потым працаваць з дзецьмі ў летніках. Наша місія – стаць для школьнікаў старэйшымі сябрамі, натхніць іх уласным прыкладам на спасціжэнне новага, зрабіць адпачынак яркім і запамінальным. І рэалізуем задуманае мы ў дзіцячым аздараўленчым лагеры «Гарызонт».
БДПУ-тэрыторыя здароўя
У alma mater прайшоў традыцыйны Дзень здароўя. Яго адкрыццё адбылося на стадыёне БДПУ пры ўдзеле 7 каманд – зборных інстытутаў псіхалогіі і інклюзіўнай адукацыі, факультэтаў прыродазнаўства, эстэтычнай адукацыі, фізіка-матэматычнага, філалагічнага і гістарычнага. Праграма свята была насычанай і ўключала спартландыю, спаборніцтвы па перацягванні каната, спартыўныя гульні. Пераможцы і прызёры турніраў – самыя хуткія, моцныя і спрытныя – ва ўрачыстай абстаноўцы былі ўзнагароджаны адпаведнымі дыпломамі. Усе без выключэння зборныя атрымалі салодкія прызы ад рэктарата БДПУ.
Наш адрас — Маскоўскі раён
У рамках спартакіяды сярод калектываў фізічнай культуры прадпрыемстваў, арганізацый і ўстаноў Маскоўскага раёна сталіцы прайшлі спаборніцтвы па лёгкаатлетычным кросе, дартсе і настольным тэнісе.
Падчас кросу добрую хуткасць на бегавой дыстанцыі прадэманстравалі лёгкаатлеты БДПУ. У выніку – 3-е агульнакаманднае месца. Яшчэ лепш выступілі нашы спартсменкі. У асабістым першынстве сярод жанчын усе прызавыя месцы – з 1-га па 3-е – занялі прадстаўніцы БДПУ: І.У. Салькевіч, В.М. Байко, Д.С. Кабішава.
У дартсе зборную БДПУ прадстаўлялі неаднаразовыя пераможцы і прызёры спартакіяды работнікаў універсітэта – начальнік СК «Педагог» І.Р. Моргун, старшы выкладчык кафедры спартыўна-педагагічных дысцыплін С.А. Глінскі і старшы выкладчык кафедры фізічнага выхавання і спорту Т.А. Бахмутава.